बराहक्षेत्र नगरपालिकाले ज्यालादारी विपन्न श्रमिक परिवारलाई कसरी राहत वितरण गर्ने भनेर बराहक्षेत्र नगरपालिकाले शुक्रबार कार्यपालिकाको बैठकबाट राहत सामाग्री वितरण गर्ने मापदण्ड तयार गरेको छ ।
जसमा कार्यपालिकाले गरेका महत्वपूर्ण निर्णयहरू मध्ये पहिलो प्राथमिकतामा रहेको भने ज्यालादारी विपन्न श्रमिक परिवारलाई जनसंख्याको आधारमा राहत सामाग्री वितरण गर्ने भएको हो । जसमा एउटा घरमा ५ जना परिवारको संख्या भएको घरधुरीलाई चामल २० केजी, दाल १ केजी, खाने तेल १ लिटर, नुन १ केजी, साबुन १ डल्ला दिने र ५ जनाभन्दा बढी परिवार भएको घर धुरीलाई चामल २५ केजी, दाल २ केजी, खाने तेल २ लिटर, नुन १ केजी र साबुन २ ओटा दिने निर्णय भएको सूचना अधिकृत पुकार पोखरेलले बताए ।
बैठकले नगरपालिकामा ११ वडा रहेको जनप्रतिनिधि ६० जनाको १ महिना बराबरको सेवासुविधाबाट प्राप्त हुने रकम समेत प्रकोप व्यवस्थापन र राहत कोषमा जम्मा गर्ने निर्णय गरेको पोखरेल बताए । बैठकले यस नगरपालिकाअन्तर्गत कार्यरत सबै कर्मचारीले नेपाल सरकारले तोकेको मापदण्डबमोजिम रकम प्रकोप व्यवस्थापन राहत कोषमा जम्मा गर्ने निर्णय समेत भएको बताए ।
विभिन्न संघसंस्थाहरुबाट आएको आर्थिक सहयोग र नगरपालिकाको १० लाख रुपैयाँ, जनप्रतिनिधिहरुको सेवासुबिधाबाट ७ लाख र कार्मचारीहरुको ३र५ दिन काम गरेको तलब बापत लगायत अन्य सहयोगीहरुबाट संकलन गरि नगरपालिकामा ४२ लाख बराबरको राहत सामाग्री वितरण गर्ने लक्ष्य रहेको बराहक्षेत्र नगरपालिका मेयर निलम खनालले बताए । ‘अहिले सबै वडाबाट लगत संकलन गरी नगरपालिकामा तथ्यांक आइसकेको छ,’ उनले भने, ‘यश बिपत् अवस्थामा सबै मिलेर हातोमालो गर्दै आफुले सक्ने सहयोग गरौं ।’
लागत संकलनमा वडाहरुबाट करिब ९ हजारको हाराहारीमा विवरण आएको सामाजिक विकास शाखा प्रमुख अरुण मेहताले जानकारी दिए । जसमा मन्त्रालयबाट तोकिएको मापदण्ड अनुसार ज्यालादारी अति विपन्न श्रमिक लगायतलाई नगरपालिका राहत बितरण गर्न लागेको उनले बताए ।
उनका अनुसार बराहक्षेत्रमा रहेका सबै वडालाई गर्दा लगभग ८ हजार घरधुरीलाई राहत बितरण हुन सक्नेछ । ‘सबै तयारी थालीसकेका छौं,’ उनले भने, ‘सामान समेत खरिद सुरु गरेका छौं । लगभग सोमबारदेखि सबै वडामा राहत सामाग्री पुग्न सक्छ ।’
