रामधुनी । र्याप गीत गायनमा रुचि हुने युवाहरुका लागि झुम्का साइफर शो सुरु हुने भएको छ । कौशला प्रोडक्सनले यही वैशाखको अन्तिम साताबाट सो शो सुरु गर्न लागेको हो ।
आयोजकलाई अनलाईन (भिडियो) मार्फत वा फिजिकल रुपमा छोटो प्रस्तुती पठाउनुपर्नेछ । त्यसपश्चात आयोजकले छनोट गरेर पुरा प्रस्तुती तयार गर्नेछ । प्रवेश शुल्क तिरेर साइफर शोमा सहभागी हुन सक्ने आयोजक कौशला प्रोडक्सनका प्रबन्ध निर्देशक तथा शोका निर्देशक बिशाल पोखरेलले बताए ।
उनका अनुसार शोमा सहभागीले आफ्नो प्रस्तुती साप्ताहिक रुपमा पनि दिन सक्नेछन् । कौशला प्रोडक्सनकै युटुब च्यानलमा हरेक हप्ता शो प्रशारण हुने पोखरेलले जानकारी दिए । हालसम्म रामधुनी क्षेत्रका आधा दर्जन भन्दा बढीले नाम दर्ता गरी साइफर शोको समुहमा प्रवेश गरिसकेका छन् ।
‘झुम्का साइफर एउटा र्याप गायनमा प्रतिभा भएका युवाहरुका लागि प्लेटफार्म हो’ उनले भने, ‘यसमा जुनसुकै ठाउँका युवाहरु पनि सहभागी हुन सक्नेछन् ।’ र्यापरहरुका लागि अवसरसहितको प्लेटफर्म भएको र पछि ब्याटलसम्मको शो बनाउन सकिने उनको भनाई छ । फिजिकल उपलब्ध हुनेहरुको भिडियो रेकर्डिङ तथा सम्पूर्ण प्रोडक्सनको काम आयोजकले नै गर्नेछ ।
