पथरी शनिश्चरे नगरपालिका वडा नम्बर ८ ले ‘जनतासंग जनप्रतिनिधि’ कार्यक्रम शनिबारबाट संचालन गरेको छ । गत स्थानीय निकायको चुनावमा जित हासिल गर्नु अघि नै उम्मेदवारले यस कार्यक्रम सन्चालन गर्ने भनी जनतासंग भोट मागेका थिए । सोही बाचा अनुरुप यो कार्यक्रम सन्चालनमा आएको हो ।
जनतासँग प्रत्यक्ष भेटेर गुनासो सुन्ने, समस्या बुझ्ने, र सामाधानका उपाय खोज्नका लागि यो कार्यक्रमलाई बृहत् बनाउने गरि सञ्चालन गरिएको छ । महिनाको अन्तिम शनिबारको दिन घरदैलो कार्यक्रम अन्तर्गत साे कार्यक्रम सुरुवात भएको हो ।
८ नं वडा कार्यालयको आयोजना रहेको उक्त कार्यक्रमको पहिलो दिनमा नगरपालिकाकी उपप्रमुख देविमाया काफ्ले, वडा अध्यक्ष नवीन कार्की, सदस्यहरु बाबुराम चौधरी, शान्ता योङ्हाङ, झमकबहादुर लिम्बू सहित स्थानिय जनसुदायको सक्रिय सहभागीता थियो । यसरी जनतासँग जाेडिने कार्यक्रम रचनात्मक लागेकाे उपप्रमुख काफ्लेले बताइन् ।
कार्यक्रमको दौरान भर स्थानीय जनसमुदायले पानीको समस्या ,बाटोको समस्या र यावत विषयमा वडाध्यक्ष वडासदस्यहरुको ध्यानाकर्षण गराएका थिए ।
खबरबिटसँग कुरा गर्दै वडाध्यक्ष कार्कीले भनें, ‘यस्ता कार्यक्रमले जनतासंग प्रत्यक्ष जोडिने मौका दिने, वास्तविक समस्या पत्ता लाग्ने हुनाले यो कार्यक्रम संन्चालन हुँदा मलाई एकदम खुशी लागेको छ ।’
कार्यक्रम पाँच वर्ष निरन्तर चलिरहने समेत वडाध्यक्ष कार्कीले जानकारी दिएका छन् ।
