कथा वाचक साईग्रेस पोखरेलले आफ्नो कथा वाचन यात्रा र यस क्षेत्रमा हासिल गरेका उपलब्धिहरूलाई समेटेर नयाँ पुस्तक ‘साईग्रेसः द स्टोरीटेलर’ सार्वजनिक गरेका छन् ।
अमेरिकाको कोलोराडोमा आयो उनको उनको एक सय औँ लाइभ प्रस्तुति कार्यक्रममा पुस्तक सार्वजनिक गरिएको हो । कार्यक्रममा लेखक हिरण्य भोजपुरे, अमेरिकाका लागि नेपालका सद्भावना दूत विनोद अधिकारी, ग्लोबल नेपाल फिल्म अवार्ड अमेरिकाका अध्यक्ष नवराज श्रेष्ठ, ख्यातिप्राप्त सङ्गीतकार मनोजराज सिवाकोटी र कोलोराडो कार्यक्रमका आयोजक सुमन केसी लगायतका उपस्थिति थियो ।
‘साईग्रेसः द स्टोरीटेलर’ पुस्तकले कथा वाचनको विश्वव्यापी इतिहासका साथै साईग्रेसका विश्वभरका प्रस्तुतिहरूका अविस्मरणीय क्षणहरूलाई प्रस्तुत गरेको छ । यसले उनको कथा वाचनले दर्शकहरूमा पारेको गहिरो प्रभावको पनि विश्लेषण गरेको छ । पुस्तकको एक प्रमुख आकर्षण उनको बहुचर्चित अडियो उपन्यास ‘मेरो अधुरो प्रेम’ हो, जुन युट्युबमा हालसम्म ६६ लाख पटक हेरिएको छ ।
पुस्तकमा साईग्रेसले आफ्नो कथा वाचन यात्राका व्यक्तिगत अनुभव र आत्म निरीक्षणहरूलाई पनि समेटेका छन् । उनको पुस्तकमा एक श्रोताले उनको एउटा कथा सुनेर आत्महत्याको विचार त्यागेर आशाको नयाँ किरण पाएको बताउँदाको शक्तिशाली क्षण पनि समावेश छ ।
