सुनसरी । बराहक्षेत्र नगरपालिकाले आर्थिक रूपले अति विपन्न रहेका परिवारलाई स्वास्थ्य बिमा गरिने भएको छ । नगरपालिका भित्र रहेका ११ सय अति विपन्न परिवारको स्वास्थ्य बिमा नगरपालिकाले गर्ने निर्णय गरको हो ।
चालु आर्थिक वर्ष २०७९/०८० को वार्षिक स्वीकृत कार्यक्रम अनुसार नगरपालिकाले प्रत्येक वडाहरूबाट १ सय परिवारका दरले स्वास्थ्य बिमा गरिने भएको हो ।
नगरपालिका प्रमुख प्रशासकीय अधिकृत ऋद्धिप्रकाश सिटौलाका अनुसार पुष २० गते बैठकबाट वडाहरू नाम पठाउन पत्राचार समेत गरी सकिएको जानकारी दिए ।
नगरपालिका भित्र स्थायी बसोबास गरिराखेका अति विपन्न परिवारका लागि स्वास्थ्य बिमा कार्यक्रम मार्फत स्वास्थ्यको पहुँचमा ल्याउन खोजिएको नगर प्रमुख रमेश कार्कीले जानकारी दिएका हुन् ।
स्वास्थ्य शाखाका जनस्वास्थ्य निरीक्षक उमेश मेहताका अनुसार टोल टोलमा रहेका अति विपन्न परिवारको नाम वडा कार्यालयले पुष महिना भित्र नगरपालिका पठाउने र स्वास्थ्य बिमा गर्ने प्रक्रिया अगाडि बढ्ने जानकारी दिए ।
स्वास्थ्य बिमा कार्यक्रमलाई प्रभावित र विवाद रहित बनाउन वास्तविक अति विपन्न परिवारको नाम मात्र पढाउन नगर प्रमुख कार्कीले वडा कार्यालयलाई निर्देशन दिएका छन् ।
