सुनसरी । हरेक बर्ष विद्यालय स्तरमा संचालन हुने विद्यार्थीहरुको अतिरिक्त कृयकलापहरुमा समावेश गराउने उद्देश्यका साथ आयोजना गरिएको स्पोट्रर्स मिट २०७९ अन्तर्गतको हिसान रनमा छात्रतर्फ इटहरीको नमुना कलेज र छात्रातर्फ धरानको धरान आदर्श प्रथम भएको छ ।
शुक्रबार बिहान भएको ५ किलोमिटर लामो दौडमा नमुना कलेजका सरोज सिंहले १४ मिनेट १० सेकेण्डमा निर्धारित दूरी पूरा गरेर प्रथम हुन सफल भएका छन् भने सुनाखरी एकेडेमीका रोदन राईले १४ मिनेट ३५ सेकेण्डमा निर्धारित दुरी पार गर्दै दोस्रो भए तथा धरान आदर्शका अर्जुन कुमार राईले १४ मिनेट ३६ सेकेण्डमा निर्धारित दुरी पार गर्दै तेस्रो भए ।
त्यस्तै छात्रातर्फको दौडमा धरान आदर्शकी आयशा लिम्बू प्रथम भएकी छिन् । उनले २० मितेट ४० सेकेण्डमा निधारीत दुरी पार गर्दै प्रथम स्थान हासिल गर्न सफल भएकी हुन् । त्यस्तै कस्तुरी कलेजकी इशा यादव र हिमशिखर स्कूलकी तनुजा थापामगर क्रमशः दोस्रो र तेस्रो स्थान हासिल गर्न सफल रहिन् ।
दोस्रो स्थान प्राप्त गरेकी यादवले २० मिनेट ५४ सेकेण्डमा र थापामगरले २१ मिनेट १० सेकेण्डमा दुरी पार गर्दै तेस्रो स्थान हातपार्न सफल रहिन् ।
यसका साथै प्रथम स्थान प्राप्त गर्ने धावक धाविकाले जनही नगद रु.१५ हजार, द्वितीयले १० हजार र तेस्रोले ५ हजार नगद पुरस्कार प्राप्त गरेका छन् ।
उक्त दौडमा बिजेता भएका धावक धाविकाहरुलाई इटहरी उपमहानगरका नगर प्रमुख हेमकर्ण पौडेल, जिल्ला प्रहरी कार्यलय सुनसरीका प्रहरी प्रमुख एसपी प्रभुप्रसाद ढकाल, प्रदेश १ ट्राफिक प्रहरी प्रमुख एसपी श्यामकुमार महतो, विश्व आदर्श कलेजका अध्यक्ष लेखनाथ घिमिरेले पुरस्कार प्रदान गरेका छन् ।
