रामधुनी । सुनसरीको रामधुनी नगरपालिका–७ मा मोटरसाइकल दुर्घटना हुँदा तीन जनाको मृत्यु भएको छ । चतरा कान्छीचोक भित्री पक्की सडक खण्डमा दुई मोटरसाइकल शनिबार राती करिब साढे सात बजे एक आपसमा ठोक्किँदा तीन जनाको मृत्यु भएको हो । दुई जना गम्भीर घाइते भएका छन् ।
इलाका प्रहरी कार्यालय पकली कान्छीचोकका अनुसार दुर्घटनामा परी घाइते भएका रामधुनी नगरपालिका–६ का ३४ वर्षीय इनर्चन चौधरी, उनकी श्रीमती ३२ वर्षीया प्रतीक्षा चौधरी र ९ वर्षिय छोरा प्रणिश चौधरीलाई धरानस्थित बीपी कोइराला स्वास्थ्य विज्ञान प्रतिष्ठानमा लागिएको थियो ।
त्यसैगरी घाइते अर्को मोटरसाइकल चालक इनरुवा ६ का ५० वर्षिय चालक बिन्दु यादव र पछाडि सवार ३६ वर्षीय रमेश चौधरीलाई पनि उपचारको लागि लगिएको थियो । दुर्घटनामा पर्ने सबैलाई प्रहरीकै दुई वटा गाडीमा उपचारका लागि लगिएको हो ।
इनर्चन, प्रणिश र अर्को मोटरसाइकमा सावार यादवको भने उपचारको क्रममा राती नै मृत्यु भएको प्रहरीले जनाएको छ । प्रहरीका अनुसार प्रतीक्षा र रमेश चौधरी गम्भीर घाइते भएका छन् ।
प्रारम्भिक अनुसन्धान अनुसार दुवै मोटरसाइकल तीव्र गतिमा रहेका कारण दुर्घटना भएको जनाइएको छ । घटनाबारे थप अनुसन्धान भइरहेको प्रहरीले जनाएको छ ।
