रामधुनी । थारु जागरण अभियान सुनसरीले थारु डान्स स्टार-२०७६ सिजन २ को सुरु गरेको छ ।
बुधबार झुम्कामा पत्रकार सम्मेलन गरी खोज नयाँ प्रतिभाको उद्देश्य राखेर थारु डान्स स्टार सिजन–२ सुरु गरेको जागरण अभियानले जनाएको छ । गाउँ तथा शहरमा रहेका थारु युवा युवतीका लुकेका प्रतिभालाई उजागर गर्ने उद्देश्यले थारु डान्स स्टार प्रतियोगिता सुरु गरेको आयोजकले जनाएको छ ।
सुनसरीको इटहरी, खनार, इनरुवा, दुहवी, कलाबञ्जर लगायतका ठाउँमा शहरमा अडिसन गरिने थारु जागरण अभियान सुनसरीका निर्देशक निशान प्रकृति थारुले जानकारी दिए । उनका अनुसार विभिन्न सहरमा अडिसन मसिंरबाट सुरु हुने छ ।
उक्त थारु डान्स स्टार प्रतियोगितामा जुनसुकै जातजातीले सहभागिता जनाउन पाउनेछन् । साथै थारु गीत संगीतलगायत नेपालको तराई मधेसमा भएका मैथली र भोजपुरी गीतहरु सहभागी गराइने आयोजकले जनाएको छ ।
प्रतियोगितामा उत्कृष्ट हुनेलाई थारु डान्स स्टार–२०७६ बाट सम्मान गरिने भएको छ । प्रथम, दोस्रो र तेस्रो हुनेलाई क्रमशः १ लाख, ५० हजार र २५ हजार रूपैयाँ, शिल्ड तथा प्रमाण पत्र प्रदान गरिने आयोजक सुनसरीकी अध्यक्ष तारादेवी चौधरी बताएकी छिन् ।
पत्रकार सम्मेलनमा थारु कल्याणकारीणी सभाका केन्द्रीय पूर्वअध्यक्ष चन्द्रकुमार चौधरी, थारु महानायक तथा निर्देशक परशुराम चौधरी, थारु डान्स स्टार–२०७५ का विजेताहरु, संगीतकार सत्यनारायण चौधरी, थारु चलचित्र तथा साँस्कृतिक संघका जानकी चौधरी,संघ, संस्थाका प्रतिनिधि लगायत सुनसरीका पत्रकारहरुको उपस्थिति रहेको थियो ।
