सुनसरी । बराहक्षेत्र वडा ३ र २ बीचको जंगलस्थित हरिनेखोला नजिकबाट प्रहरीले भरुवा बन्दुकसहित दुईजनालाई पक्राउ गरेको छ ।
हरिनेखोलामा शिकार गर्दै गरेको चतरा सब डिभिजन वन कार्यालयलाई गोप्य सूचना आएपछि वन अधिकृत शिवलाल बिकसहितको टोलि गएर प्रहरीले पक्राउ गरेको हो ।
उक्त स्थानमा पुग्दा बन्दुकसहित हतियार लिएर शिकार गर्दै गरेको अवस्थामा बराहक्षेत्र ३ नडाहा बस्ने प्रेमबहादुर कार्की र सोही स्थानमा बस्ने बमबहादुर मगरलाई पक्राउ गरेको सशस्त्र प्रहरी बल चतराका प्रहरी निरीक्षक असोक न्यौपानेले बताए ।
वन अधिकृत बिक, इलाका प्रहरी कार्यालयका प्रमुख शरण दाहाल र सशस्त्र प्रहरी चतराका प्रमुख असोक न्यौपानेको टोलीले उनीहरुलाई एक थान भरुवा बन्दुक र दुई बोतल बारुद , दुई वटा खुकुरी, दुई वटा मोबाइल, डोरी, १४ वटा सिसाको गोलीसहित पक्राउ गरेको न्यौपानेले बताए ।
पक्राउ परेका दुई जानालाई इलाका प्रहरी कार्यालय महेन्द्रनगर हिरासतमा राखिएको इलाका प्रहरी प्रमुख सरण दाहालले बताए ।
उनीहरुलाई हातहतियार तथा खरखाजना नियम अनुसार कामकारबाही अगाडि बढाएको दाहालले बताए ।
