बराहक्षेत्रमा बसन्तऋतुका विद्यार्थीले गरे विद्यालयमा तालाबन्दी, नगरपालिकामा नाराबाजी
विद्यालयमा राजनीति गरेको भन्दै बराहक्षेत्र–७ देवीघाटस्थित बसन्तऋतु माविका विद्यार्थीहरुले विद्यालयमा आइतबार तालाबन्दी साथै नगरपालिकामा धर्ना समेत दिएका छन् ।
अहिले विद्यालयमा पठन पाठन समेत अवरुद्ध भएको छ । उनीहरुले विद्यालयमा तालाबन्दी गरेपछि विद्यार्थीहरु बाटोमा नाराबाजी गर्दै बराहक्षेत्र नगरपालिकाको गेटमा समेत नाराबाजी गरेको थिए ।
विद्यालय प्रशासन, व्यस्थापन समितिसँग अंग्रेजी शिक्षक तत्काल नियुक्त गर्न माग गर्दै तालाबन्दी गरेका हुन् । विद्यालय प्रशासनले व्यवस्थापन समिति चयन प्रकृयामा राजनीतिकरण गरेको, अंग्रेजी पढाई गर्ने शिक्षक नल्याएको विरोधमा उनीहरुले एक दिन कक्षा बहिस्कार गर्दै तालाबन्दी गरेको विद्यार्थीहरुले बताएका छन् ।
गत असोज १३ देखि तत्कालिन व्यस्थापन समितिको कार्यकाल सकिए पनि नयाँ समिति प्रकृया राजनीतिक खिचातानीले ढिलाई हुँदा विद्यार्थीको सुविधा र शिक्षा व्यवस्थापनमा असर परेकोले तालाबन्दी गरिएको कक्षा १० का छात्र सुमन बस्नेतले बताए ।
उनका अनुसार माग पूरा नभए अनिश्चितकालिन तालाबन्दी गरिने छ । व्यवस्थापन समिति गठन गर्न विद्यालय प्रशासनले मंसिर १३ गते अभिभावक भेला बोलाए पनि सहमति नजुटेकाले मंसिर १८ गते दुई पुरुष र दुई महिला अभिभावकहरुबाट खेमराज उदास, इन्दिरा पराजुली, अम्बिका बजगाई, गोपाल घिमिरेलाई सदस्यमा चयन गरेको थियो ।
शिक्षा ऐन २०२८ को दफा १२ को उपदफा १ बमोजिम २ अनुसार वडा कार्यालयका प्रतिनिधि, शिक्षक प्रतिनिधि, प्रध्यानाध्यापक र ४ जना मध्ये जेष्ठ सदस्यको अध्यक्षतामा बसेको पहिलो बैठकले चन्दादाताबाट दयाराम रेग्मी र मिनाकुमारी राई पनि सदस्यमा चयन ग¥यो । तर महिना बितेपनि समितिको अध्यक्ष चयन नभएकाले विद्यार्थीले ध्यानाकर्षण गराएको हो ।
व्यस्थापन अध्यक्ष नहुँदा शिक्षक नियुक्ति प्रकृया रोकिएको, विद्यालयमा राजनीति पसेको, गुणस्तरीय शिक्षा अन्य क्रियाकलापहरु हुन नसकेको विद्यार्थीहरु बताउँछन् । प्रधानाध्यापक कुमारप्रसाद भट्टराईले व्यवस्थापन समिति गठनमा अध्यक्ष को रहने विवाद हुँदा ढिलाई भएको बताए ।
उनका अनुसार सोमबार निर्णय हुने मिति तय भएको छ । अंग्रेजी शिक्षक नियुक्ती प्रकृयामा रहेको र विद्यालयमा करारमा रहेकी माबि तहकी अंग्रेजी शिक्षिका इन्दिरा काफ्ले आयोग उत्तिर्ण गरेर बिदाइ भएपछि शिक्षक नभएको बताए ।
‘समिति र शिक्षक अभावले बिद्यार्थीहरुमा पुगेको असुबिधा चाडो भन्दा चाडो टुंगोमा पु¥याइने छ ।’ उनले भने । व्यवस्थापन समितिमा शिक्षक प्रतिनिधि इन्द्रप्रसाद भट्टराइले सहमति पनि नहुने निर्वाचन प्रकृया पनि नहुँदा समिति चयनमा ढिलाइ भएको बताए ।
उनले वडा प्रतिनिधिको रुपमा सदस्य वडाध्यक्ष वीरबहादुर लिम्बू र चन्दादाता रेग्मी चुनाब प्रकृयामा जान नमान्दा ढिला भएको बताए । व्यवस्थापन अध्यक्षमा नेकपाका दयाराम रेग्मी र कांग्रेसबाट गोपाल घिमिरे दाबेदार रहेका छन् ।
