सुनसरी । बराहक्षेत्र नगरपालिकाले नगरभित्रका ४ वटा उपभोक्ता समितिलाई काम सच्याउन निर्देशन दिएको छ । समितिहरुले आँखा छल्ने काम गरेको भन्दै नगरपालिकाले ति निर्माण उपभोक्ता समितिलाई निर्देशन दिएको हो । निर्देशन अटेर गरे अन्तिम किस्ता रोक्ने नगरले चेतावनी दिएको छ ।
बालचन खोरियाबाटो ग्राभेल निर्माण उपभोक्ता समिति बराहक्षेत्र २, ड्रेन निर्माण समिति प्रकाशपुर, ग्राभेल बाटो निर्माण समिति र पैनिबाटो ग्राभेल निर्माण समितिलाई काम नसच्याए अन्तिम बजेट रोक्का गर्ने गरी निर्देशन दिएको प्रशासकीय अधिकृत मनुकुमार लिम्बूले बताए ।
बालचन खोरिया बाटो ग्राभेल निर्माण समितिले ५ लाख रुपैयाँको बजेटमा काम गर्नुपर्ने सम्झौता थियो । नगरपालिकाको स्टेटमेन्ट अनुसार ७ सय ५० मिटर हुनुपर्नेमा समितिले ६ सय ७२ मिटरमात्र काम गरेको पाएको लिम्बुले बताए ।
वडा नम्बर १० प्रकाशपुर बजारमा ड्रेन निर्माण समितिले १ सय ७१ मिटर गर्नुपर्नेमा १ सय ६१. ६ मिटर गरेको पाएको छ । १० लाख रुपैयाँ बजेट भएपनि उक्त समितिले सो बजेट अनुसार काम नगरेपछि नगरले निर्देशन दिएको हो ।
मुस्कान चोक दक्षिण ९ र १० सीमासम्म ग्राभेल बाटो निर्माण समितिले ७ सय ५० मिटर काम पूरा गरे पनि उक्त समितिले मिक्स गिटी भने अत्यन्त थोरै लगाएको पाइएको छ । उक्त समितिले ६ लाख रुपैयाँ बराबरको काम गरे पनि गिटी भने थोरै प्रयोग गरेको नगरले जनाएको छ ।
वडा नम्बर १० मै १० लाख रुपैयाँ बराबरको काम पाएको पैनिबाटो ग्राभेल निर्माण समितिले समेत मिक्सगिटि कम लगाएको पाइएपछि उक्त बजेट रोक्का गरेको लिम्बूले बताए । लिम्बूले सबै निर्माण समितिलाई काम सच्याउन सुझाव दिएको बताए ।
उक्त बाटोहरुमा थप गिटि र नगरले भने बमोजिमको स्टमेट नाप अनुसार काम गर्नु पर्ने उनको भनाइ थियो ।
