रामधुनी । लामोसमयदेखि धुलो र हिलोको समस्यामा रुपमा रहँदै आएको झुम्का सिंगिया सडकखण्डमा कालोपत्रे सुरु भएको छ । सुनसरी मोरङ सिँचाइ आयोजनाको नहर छेउको सो सडकखण्डमा कालोपत्रे सुरु भएको हो ।
हाल नगर र प्रदेशले छुट्याएको रकममा सकड कालोपत्रे भइरहेको वडा नम्बर ५ का अध्यक्ष डेगराज फूयालले बताए । उनका अनुसार सो सडकखण्ड ४ लेनको बन्ने छ । वडाले अघि सारेको ड्रिम प्रोजेक्टको योजनालाई अहिले प्रदेश र नगरले मुर्त रुप दिएको उनको भनाई छ ।
झुम्का चोकदेखि हालको वडा नम्बर ३ को कार्यालय (सिंगिया)सम्म करिब ३ किलोमिटर सडकखण्डमा कालोपत्रे सुरु भएको हो ।
डिपीआर बजेट १४ करोड रुपैयाँ
निर्माणमा प्रदेश सरकारले डिपीआरमा जम्मा १४ करोड रुपैयाँ बजेट छुट्याएको छ । बहुवर्षीय योजनामा निर्माण सुरु भएको योजनाको सम्झौता भने गत फागुनमै भएको थियो ।
कोभिड १९ ले गर्दा यस आर्थिक वर्षमा प्रदेशले बजेट नछुट्याएपनि अघिल्लो आ.व.कै एक करोड ५० लाख र रामधुनी नगरपालिकाको ७५ लाख गरी कुल दुई करोड २५ लाख रुपैयाँको लागतमा अहिले कालोपत्रसहितको निर्माण योजना सुरु गरिएको फुयालको भनाइ छ ।
बगैँचा र लाइटसहितको योजना
नगरकै ड्रिम प्रोजेक्टको रुपमा रहेको यस सडकखण्ड कालोपत्रेको योजना अन्तर्गत सो खण्डको बीचमा बगैँचा समेत राखिने भएको छ । वडाध्यक्ष फुयालका अनुसार सडकमा दुबैतिर सात सात मिटर र बीचमा ८ फिटको गरी ४ लेनको सडक बन्ने र कालोपत्रे हुने छ । ‘यो ड्रिम प्रोजेक्ट हो, सडक ४ लेनको हुन्छ,’ उनले भने, ‘दुबै साइडको छेउछेउमा लाइटको व्यवस्था हुनेछ भने बीचमा आकर्षक बगैँचा निर्माण हुन्छ ।’
यसका साथै छेउमा रहेको सिँचाइ आयोजनाको नहरलाई सरसफाइसहित व्यवस्थित गर्ने र बोटिंगसहित हाल निर्माण भइरहेको सडकको छेउमा साँझ बजार लाग्ने व्यवस्थ मिलाउने उनको भनाइ छ । ‘साँझको समयमा नहर किनार तथा सकड छेउमा भेटघाट गर्न मिल्ने गरी नहर समेत सरसफाइ हुन्छ,’ उनले भने, ‘यसले पर्यटन विकासमा समेत टेवा पुर्याउँछ भन्ने आशा छ ।’ यसका साथै छेउछेउमा रुख रोपेर हरियाली समेत बनाउने योजना रहेको उनको भनाइ छ ।
लकडाउनले ढिलाई
सो सडकखण्ड कालोपत्रे गर्न नेपालमा लकडाउन सुरु हुनु अघि अर्थात गत फागुन मै सम्झौता भएको थियो । प्रक्रियागत ढंगले ठेकेदार कम्पनी आह्वान गरी सो प्रोजेक्ट इनरुवाको साह निर्माण सेवाले पाएको थियो । लकडाउन र कोभिड १९ को संक्रमण फैलिन सक्ने अवस्थालाई मध्यनजर गरेर सम्झौतापछिको यस अवधिमा काम गर्न नसकिएको बताइएको छ ।
सर्वसाधरणलाई सहज
सो सडकखण्ड निकै लामो समयदेखि सर्वसाधरणले समस्या भोग्दै आएका थिए । वर्खायाममा अत्यधिक हिलो, खाल्डो र पानी जम्ने र अन्य समयमा उत्तिकै मात्रामा धुलो उड्ने समस्या रहेको थियो ।
हाल कालोपत्रे सुरु भएपछि सो बाटो नियमित हिँड्ने सर्वसाधरणले भने अब राहत पाउने स्थानीयको भनाइ छ । धुलो, हिलोलगायतका समस्या भोग्दै आएका रामधुनीका ३ का कमल चौधरीले अब भने सो सडकहुँदै आवतजावत गर्न सहज हुने बताए ।
यता रामधुनी मेडिकल हलका सञ्चालक समेत रहेका मनिष गेलालले सो बाटोले अब धेरैलाई सहज हुने बताए । हिलो, खाल्डो र धुलोको मारमा रहेका सर्वसाधारणलाई अब सो समस्या नहुने उनको भनाइ छ ।
