सुनसरी । सुनसरीको हरिनगर गाउँपालिका ७ घुस्कीमा नेकपा, संघीय समाजवादी फोरम, राप्रपा लगायतका गरी ५ सय जनाभन्दा बढी नेता तथा कार्यकर्ता कांग्रेसमा प्रवेश गरेका छन् ।
कांग्रेस सुनसरी क्षेत्र नम्वर ४ ‘ख’ ले दशैं, तिहार तथा छठको अवसरमा आयोजना गरेको शुभकामना आदानप्रदान तथा चियापान कार्यक्रमका प्रमुख अथिति नेपाली कांग्रेसका केन्द्रीय सदस्य तथा क्षेत्र नं ४ का सासंद ज्ञानेन्दबहादुर कार्की, क्षेत्र नं २ का सांसद सिताराम मेहता, प्रदेशसभामा विपक्षी दलका नेता राजिब कोइराला, प्रदेश सांसद हाजि ताहिर अन्सारी, क्षेत्र नं. ४ क्षेत्रीय सभापति एवम् कोशी गाउँपालिका अध्यक्ष एजुब अन्सारी, हरिनगर गाउँपालिका अध्यक्ष गफार अन्सारीले नवप्रवेशीहरुलाई पार्टी प्रवेश गराउँदै स्वागत गरे ।
कांग्रेसले सोही क्षेत्रलाई लक्षित गरी सभा आयोजना गरी नेकपासहित अन्य दलका पाँच सय भन्दाबढी नेता तथा कार्यकर्तालाई पार्टीमा प्रवेश गराएको हो । कार्यक्रममा घुस्की बजार व्यवस्थापन समितिका अध्यक्ष तथा नेकपाका कार्यकर्ता जहागिर अन्सारी सहित विभिन्न पार्टीका स्थानीय नेता तथा कार्यकर्ता कांग्रेसमा प्रवेश गरेका थिए ।
कार्यक्रमलाई सम्बोधन गर्दै हरिनगर गाउँपालिका अध्यक्ष गफार अन्सारीले कांग्रेसको विकासका कामहरु हेर्न नेकपालाई चुनौति दिएका थिए । ‘जुन स्थानीय तहमा नेकपाले जितेको छ त्यहाँको विकासका कामहरु हेर्नु,’ उनले भने, ‘यदि हामी भन्दा बढी विकास छ भन्ने अनि आएर विरोध गर्नु ।’ उनले प्रदेश नं. १ मा सबै स्थानीय तह भन्दा बढी हरिनगर गाउँपालिकाले विकास गरेको दबी समेत गरे ।
क्षेत्र नं. ४ का सभापति एवम् कोशी गाउँपालिका अध्यक्ष एजुब अन्सारीले पनि नेकपालाई घुस्कीबाट खुला चुनौति दिएका छन् । नेकपाको सरकारले गरिबहरुले रोजिरोटी कमाउन सानो तिनो व्यापार गरि खान समेत नदिने, प्यान लिएर मात्रै व्यापार गर्ने नियम लगाएर कर असुली गरिरहेको आरोप लगाए ।
नेपालमा सरकारी तलब भत्ता खाने सबैलाई प्यान लिए मात्रै तलब पाउने त्यहाँबाट समेत कर लिने गरेको छ । नेपालमा रहेको कल करखनामा भारती नागरिकहरुले कयौं वर्ष देखि काम गर्दै आइरहेको उल्लेख गर्दै उनले कसरी प्यान बनाउने कसैरी तलब खाने सरकारले नबुझेको बताए ।
