सुनसरी । पूर्व अर्थमन्त्री तथा क्षेत्र नं ४ का सासंद कांगे्रस नेता ज्ञानेन्द्र कार्कीले दुई तिहाईको दम्भका नेकपा पतनको बाटोतर्फ अग्रसर हुँदै गएकाले मुलुकको समृद्धि र दीर्घगामी विकासका लागि कांग्रेस बाहेकको विकल्प नरहेको बताए ।
सुनसरीको हरिनगर ७ घुस्कीमा कांग्रेस सुनसरी क्षेत्र नम्वर ४ ‘ख’ ले मंगलबार दशैं, तिहार तथा छठको अवसरमा आयोजना गरेको शुभकामना आदानप्रदान तथा चियापान कार्यक्रममा कार्कीले यस्तो बताएका हुन् ।
सरकारले जनताका हितका लागि कुनै काम गर्न नसकेको, दैनिक भ्रष्टाचार बढिरहेको, संविधान विपरितका कामहरु गर्न थालेको आरोप लगाउँदै कांग्रेसले सरकारको गलत रवैयाविरुद्ध सशक्त रुपमा आन्दोलन गर्ने चेतावनी दिए ।
कार्यक्रमका वक्ताहरुले सातै प्रदेशमा कांग्रेस सरकारले चुनेका प्रदेश प्रमुख बरखास्त गरिएको प्रति रोष प्रकट गरेका थिए । वर्तमान सरकारले सहमति र सहकार्यको बाटो बन्द गरेको भन्दै उनीहरुले अधिनायकवादतर्फ उन्मूख वर्तमान सरकारलाई लगाम बेगरको घोडाको संज्ञा दिए ।
हारुन अन्सारीको अध्यक्षतामा सम्पन्न कार्यक्रमका प्रमुख अतिथि ज्ञानेन्द्र कार्कीसहित सांसद सीताराम मेहता, प्रदेश १ प्रमुख प्रतिपक्षी दलका नेता राजिव कोइराला, पूर्व गृह राज्यमन्त्री हरी सापकोटा, हरिनगर गाउँपालिका अध्यक्ष गफार अन्सारी, कोशी गाउँपालिका अध्यक्ष ऐयुब अन्सारी, सदानन्द मण्डल लगायतकाले मन्तब्य राखेका थिए ।
