भुटाहा । सरकारले लकडाउनको समयमा सीमानाकामा कडाई गर्न निर्देशन गरेपनि सुनसरीको सीमामा आवतजावत भइरहेको पाइएको छ ।
विश्वव्यापी फैलिरहेको कोरोना भाइरस (कोभिड १९) को रोकथामका लागि लकडाउन कडा बनाइरहेका बेला सुनसरीका सीमा क्षेत्रका स्थानीय भने त्रसित जीवन बिताइरहेका छन् । सीमाका स्थानीहरुले नेपाल भारत आवतजावत नरोकिएको र जसले गर्दा जाेखिम पनि बढ्दै गएकाे बताएका छन् ।
सुनसरीको दक्षिण क्षेत्र खुल्ला सीमाका भएका कारण अवैध रुपमा लुकिछिपि नेपाल प्रवेश गर्नेहरु अझै नरोकिएको सीमा क्षेत्रका स्थानीको भनाइ छ ।
स्थानीय सदाम अन्सारीका अनुसार भारतीय बजार घुरणा र बस्मतियामा दैनिक सयौं जना जानेगरेका छन् । बजारबाट दैनिक सरसामान तथा लत्ताकपाडा ल्याउने गरेकोले थप जोखिम बढेको अन्सारीको भनाइ छ ।
दिउँसो दुईतर्फी नै आवतजावत भइरहेपनि रातिको समयमा अवैध रुपमा लुकिछिपि भारतबाट नेपाल प्रवेश गर्ने गरेका छन् ।सुनसरीको कोशी ब्ययारेजदेखि साहेवगञ्जसरहेको खुला सीमानाका कारण स्थानीय नेपाल भारत दैनिक रुपमा आवतजावत गरिरहेको स्थानीयको भनाइ छ ।
सीमा क्षेत्रमा सशस्त्र प्रहरी बल तैनाथ गरिए पनि विभिन्न स्थानबाट नेपाल प्रवेश गर्ने क्रम नरोकिएको स्थानीहरुको भनाइ छ । सम्बन्धित स्थानीय सरकार भने आवतजावत नभएको र कोही पभि नभित्रिएको दाबी गरिरहेका छन् ।
शनिबार बिहान १० बजे गरिएको स्थलगत अनुगमनबाट पनि भारतस्थित नजिकको बजार जाने र आउने गरेको पाइएको छ ।
सुरक्षा व्यवस्था कडा पारेपछि भारतको विभिन्न ठाउँबाट आएर दिउँसो भारतमा बस्ने र रातिको समयमा नेपाल प्रवेश गरेको हुन सक्ने सीमा सुरक्षामा खटिएका प्रहरी जवान बताउँछन् ।
जिल्लाको सीमा नाकाबाट कोरोना भाइरस संक्रमित कोही पनि व्यक्ति भित्रिन नदिन सुनसरीमा व्यापक सशस्त्र प्रहरी परिचालन गरिएको सशस्त्र प्रहरीका एसपी कृष्ण ढकालले बताए । सशस्त्र प्रहरीले सीमा क्षेत्रमा भारतीय सुरक्षा अधिकारीहरुसँग समेत समन्वय गरेर सुरक्षामा खटिरहेको ढकालको भनाइ छ ।
