सामान्यतया, सोह्र श्राद्ध सकिन थालेपछि दशैँको लागि बजारमा चहलपहल सुरु हुन्छ । सुनसरी स्थित इटहरीका पसलहरुमा दशैँको सामान किन्नेहरुको चहलपहल नदेखिएसम्म दशैँको आभाष नै हुँदैन । तर यसपाली भने दसैं तिहार नजिकै आइसक्दा पनि व्यापारमा सोचेजस्तो लाभ नहुँदा इटहरीका व्यापारीहरु चिन्तित देखिन्छन् ।
सुनसरीको इटहरीका व्यपारीहरू दसैंको मुखमा पनि सोचे अनुसारको व्यापार नहुँदा निराश बनेका हुन्। अघिल्ला वर्ष दसैंको समयमा ग्राहकहरुको अत्यन्त भीडभाड हुने मुख्य बजार क्षेत्र अहिले शुन्य देखिन्छन। केही चहलपहल त छ तर सोचे अनुसारको ब्यापार हुन नसकेको व्यापारीले गुनासो गरेका छन्। पहिलाको तुलनामा हाल व्यापार १५/२० प्रतिशत मात्र रहेको व्यापारी हरु बताउँछन्।
चाडवार्डको समयमा व्यापार फस्टाउनुु पर्नेमा हाल बोनी पनि मुस्किलले हुने गरेको उनिहरुको भनाइ छ। यस्तै व्यापार राम्रो सँग नचल्दा व्यापारीहरु चिन्तित देखिन्छन्।
व्यापार आर्थिक बन्दी साथै जनतासंग प्रयाप्त पैसा नभएको र नजिकै भारतीय सिमाना क्षेत्र भएकाले मानिसहरू उतै किनमेल गर्न गएको हुन सक्ने व्यवसायी अनिस उप्रेतीले बताएका छन्।
यस्तै पहिलाको दसैंको समयमा जुन किसिमको मानिसहरूको उत्सुकता छ त्यो किसिमको उत्सुकता हाल हराउँदै गएको व्यवसायी युगेश कार्की बताउँछन्। ‘जुन किसिमको चाप पहिलाको समयमा हुन्थ्यो त्यो किसिमको चाप भने पसलमा भएको छैन’ कार्कीले भने, ‘बाटामा जति चहल पहल छ, त्यो किसिमको व्यापार भने हुन सकिरहेको छैन।’
पोहोर सालको अनुपातमा हाल व्यापार निकै कम भएको अर्का व्यवसायी पुनम श्रेष्ठले बताइन्। ‘चाडवाडको समयमा पसल ग्राहकहरूले भरीभराउ हुने गर्थ्याे,’ उनले भनिन्, हाल केही मात्रामा मात्र ग्राहक आउने गरेका छन्।’ उनले बैंकिङ कारोबार, पैसाको क्राइसिस साथै कोरोना पछिको अवस्थाले गर्दा पनि व्यवसाय राम्रोसँग चल्न नसकेको हुने सक्ने अनुमान गरिन्।
केही वर्ष अघिसम्म इटहरीका मुख्य बजार क्षेत्रमा हिँड्नसमेत ठाउँ नहुने गरेर मानिसहरु किनमेलका लागि आउने गरे पनि यसवर्ष भने केहि मात्रामा मात्रै आइरहेको उनीहरू बताउछँन्। व्यापारीका अनुसार अझ कोरोना महामारी पछि व्यापार व्यवसाय राम्रोसँग फस्टाउन सकिरहेको छैन।
