आगामी मंसिर ४ गते हुने भनिएको प्रतिनिधिसभा तथा प्रदेश सभा सदस्यको निर्वाचनमा उम्मेद्वारी दिएका उम्मेद्वारहरुले निर्वाचन प्रचारप्रसारका कार्य गर्दा केही सिमानाहरु पालना गर्दै प्रचारप्रसार गर्न सक्ने आयोगले व्यवस्था गरेको छ ।
निर्वाचन आचारसंहिता, २०७९ को दफा १३ मा उल्लेख भए अनुसार राजनीतिक दल, उम्मेद्वार, दलको भातृ संगठन तथा सम्बन्धित व्यक्तिले जुलुस, आमसभा, कोणसभा, बैठक, भेला वा निर्वाचन प्रचारप्रसार सम्बन्धी कार्य गर्दा पालना गर्नुपर्ने आचरणको व्यवस्था गरिएको छ ।
दफा १३ को (म) मा अन्तिम नामावली प्रकाशन भएपछि मतदान हुने दिनभन्दा १७ दिन देखि मात्र निर्वाचन प्रचारप्रसार अन्तर्गत जुलुस, आमसभा, कोणसभा गर्न र सञ्चार माध्यममा आफ्नो निर्वाचन सम्बन्धी सामागी प्रकाशन वा प्रसारण गर्न मिल्ने व्यवस्था रहेको कारण कार्तिक १७ गतेदेखि मंसिर १ गतेसम्म सकिने निर्वाचन आयोगले जनाएको छ । निर्वाचन मंसिर ४ गते विहान ७ बजे मतदान सुरुभएको हुनाले उक्त समय भन्दा ४८ घण्टा अगाडीबाट निर्वाचनको जीरो समय अर्थात प्रचारप्रसार गर्न नपाउने भएको र निर्वाचनको १७ दिन पहिला प्रचारप्रसार गर्ने मिल्ने समेत आयोगले व्यवस्थ गरेको आयोगका निर्वाचन आयुक्त रामप्रसाद भण्डारीले बताए ।
आचारसंहिता बमोजिम निर्वाचन प्रचारप्रसारका लागि आमसभा, कोणसभा गर्दा मञ्चको तयारीको लागि लागेको खर्चको विवरण सम्बन्धित उम्मेदवारले आफैँ वा प्रतिनिधिमार्फत मतदान सम्पन्न भएको १५ दिनभित्र निर्वाचन कार्यालयमा पेश गर्नुपर्ने आयोगले जनाएको छ ।
साथै, दल वा उम्मेदवारले जुलुस, आमसभा, कोणसभा, घरदैलो भेटघाट वा जुनसुकै प्रकारको¥याली गर्दा बढीमा १० वटा दलको झण्डा प्रयोग गर्न सकिने, कुनै पनि धर्मको नाममा प्रचारप्रसार गर्न गराउन नहुने, उम्मेदवार तथा निजको परिवारलाई कुनै तवरबाट डर, त्रास तथा धम्की दिन नहुने र कुनै साम्प्रदायिक विद्वेष फैलाउने गरी प्रचारप्रसार गर्न वा मत माग्न नहुने प्रावधानहरू आचारसंहितामा रहेको व्यहोरासमेत स्मरण गर्दै निर्वाचन प्रचारप्रसारमा लाग्न सम्बद्ध पक्षहरूमा आयोगले अनुरोध गरेको छ ।
