सुनसरी सदरमुकाम इनरुवा ४ बाट एक करोड ८२ लाख ५१ हजार रुपैयाँ नेपाली नक्कली नोटसहित पक्राउ परेका एक जनालाई जिल्ला प्रहरी कार्यालय सुनसरील सार्वजनिक गरेको छ । सुनसरी खोला नजिकबाट पुलनजिक नियमित चेक गर्नेक्रममा आइतबार बिहान करिब १० बजे प्रहरीले नक्कली नोटसहित एक भारतीय नागरिकलाई पक्राउ परेको थियो ।
पक्राउ पर्नेमा भाारत सुपौल बिरपुर थाना बस्ने २२ वर्षीय छोटु भनिने मोहम्मद सैयद रहेको सुनसरीका प्रहरी उपरीक्षक बिपिन रेग्मीले जानकारी दिए । रेग्मीका अनुसार एक हजारको १८ हजार २ सय ५१ थानका गरी जम्ममा एक करोड ८२ लाख ५१ हजार रुपैयाँ नेपालीसहित पक्राउ गरिएको हो ।
बिआर ११ एक्स ३४२९ नम्बरको स्कोरपियो गाडीलाई चेक गर्दा स्कारपियोको पछाडीको भागमा लुकाएर ल्याइएको नक्कली नोट बरामद भएको रेग्मीले बताए । उनका अनुसार स्कारपियो भारतको कुन ठाउँबाट आएको हो भन्नेबारे भने अनुसन्धान भइरहेको छ ।
नोट कारोबारमा अरु व्यक्ति पनि संलग्न रहेको बिषयमा अनुसन्धान भइरहेको सुनसरीका प्रहरी नायव उपरीक्षक नविनकृष्ण भण्डारीले जानकरी दिनुभयो । प्रहरीका अनुसार सुनसरीमा पहिलो पटक ठूलो परिमाणमा नेपाली नक्कली नोट बरामद भएको हो । यस अघि पनि प्रहरीले सुनसरीको इटहरीबाट गत असोजमा करिब १४ लाख रुपैयाँसहित १ जनालाई नियन्त्रणमा लिएको थियो ।
बरामद गरिएको केहीबाहेक अधिकांश नोटमा एउटै नम्बर रहेको छ । नक्कली नोटमा बिगतका कार्यकालको गर्भनरको हस्ताक्षर रहेको छ भने कुनै नोट खस्रो रहेको प्रहरीले जनाएको छ । नोट अन्य नोटको तुलनामा हलुको रहेको प्रहरीले जनाएको छ ।
पक्राउ परेकालाई मुलकी अपराध संहिता २०७४ को परिच्छेद २२ अन्तर्गत मुद्रा सम्बन्धी सुनसरी जिल्ला अदालतबाट म्याद थप भई थप अनुसन्धान भइरहेको प्रहरी उपरीक्षक रेग्मीले जानकारी दिए । मुलकी अपराध संहिता २०७४ को परिच्छेद २२ अन्तर्गत मुद्रा सम्बन्धी कसुरमा १० बर्ष सम्म कैद र पच्चास हजार रुपैयाँ देखि १ लाख रुपैयाँ सम्म जरिवाना हुने व्यवस्था रहेको छ ।
