बराहक्षेत्र । सुनसरीको बराहक्षेत्र नगरपालिकाले नगरका एक हजार एक सय परिवारको निःशुल्क स्वास्थ्य बीमा गर्ने भएको छ । नगरपालिकाले ११ वडाका प्रत्येक वडा बाट १ सय जनाको दरले नगरका अति विपन्न ११ सय नागरिकलाई निःशुल्क स्वास्थ्य बीमा गरिदिने भएको छ ।
स्वास्थ्य शाखा अन्तर्गत चालु आर्थिक वर्षमा विनियोजित ३८ लाख ५० हजार रुपैयाँबाट बराहक्षेत्र नगरपालिकामा स्थायी बसोबास गरिरहेका अतिविपन्न परिवारका नागरिकको निःशुल्क स्वास्थ्य बीमा गर्न लागेको प्रशासकीय अधिकृत राजेस प्रसाद पोखरेलले बताए ।
स्वास्थ्य बीमा गर्न प्रत्येक वडाबाट एक सय विपन्न परिवारको नाम छनोट गरि तथ्यांक पठाउन वडा कार्यालयलाई पत्राचार समेत गरिएको उनले बताए । उनका अनुसार केही दिनमै तथ्यांक आएपछि बीमा फारम भर्न सुरु गर्ने पोखरेलले जानकारी दिए । उनका अनुसार परिवारका ५ जना सदस्यको शुल्क नगरपालिकाले नै तिर्ने छ ।
बराहक्षेत्र ४ नम्बर वडा अध्यक्ष आसाराम चौधरीले बीमाका लागि लागत संकलन तयार भइरहेको जानकारी दिए । नगरले निःशुल्क स्वास्थ्य बीमा गर्ने भएपछि विपन्न परिवार हर्षित भएका छन् ।
नेपाल सरकारले २०७२ चैत्रदेखि २५ गतेदेखि नागरिकको स्वास्थ्य बीमा गर्दै आएको छ । सो बीमाका लागि पाँच जनाको परिवारले वार्षिक ३ हजार ५ सय रुपैयाँ तिर्दा वार्षिक एक लाख रुपैयाँसम्मको सेवा पाइन्छ । परिवारमा ५ जनाभन्दा बढी सदस्य रहेको हकमा प्रतिसदस्य अतिरिक्त ७ सय रुपैयाँ तिर्नुपर्ने हुन्छ ।
