सुनसरी । सुनसरीको भोक्राहा नरसिंह गाउँपालिका वार्ड नं. १ मा भोक्राहामा साना किसान कृषि सहकारी संस्था लिमिटेडले शनिबार ५० प्रतिशत अनुदानमा उन्नत जातको धानको बिउ वितरण गरेको छ ।
सहकारी संस्थाले भोक्राहा नरसिंह गाउँपालिका वार्ड नं. १ बलुवाटरका ५५ जना किसानहरुलाई आवश्यकता अनुसार उन्नत जातको राधा बाह्र धानको बिउ वितरण गरिएको सहकारीका अध्यक्ष उमेश कुमार मेहताले जानकारी दिए । शनिबार एक कार्यक्रम आयोजना गरी बीउ वितरण गरेको उनको भनाइ छ ।
आगामी दिनमा पनि गाउँपालिका र भोक्राहा साना किसान कृषि सहकारी संस्थाको साथ आवश्यक रहने बिउ प्राप्त गर्ने किसानहरुको भनाइ छ ।
सो कार्यक्रममा भोक्राहा नरसिंह गाउँपालिकाकी कृषि शाखा प्रमुख रेनुका चौधरी, नेपाली काग्रेँस भोक्राहा नरसिंह गाउँ कमिटीका सभापति युवराज दाहाल, पशुपति शिक्षा मन्दिर भोक्राहा नरसिंह गाउँपालिका वार्ड नं. २ का प्रधानाध्यापक पवन मेहता, श्यामाश्याम कृषि सहकारी संस्थाका अध्यक्ष प्रविण मेहता, भोक्राहा साना किसान कृषि सहकारी संस्थाका उपाध्यक्ष सुरेन्द्र मेहता लगायतको उपस्थिती रहेको थियो ।
यता कोरोना भाइरसको मारमा रहेका किसानहरुको सहजताका लागि भोक्राहा नरसिंह गाउँपालिकाकी कृषि शाखा प्रमुख रेनुका चौधरीले बिदाको समयमा समेत नियमित कार्यलयमा उपस्थित भई किसानहको लागि नियमित काम गरी विभिन्न कार्यक्रमहरु सञ्चानमा ल्याएकी छन् ।
५० प्रतिशत अनुदानमा उन्नत जातको धानको बिउ वितरण गर्नका लागि भोक्राहा नरसिंह गाउँपालिका अन्तरगत रहेका ११ वटा कृषि सहकारी संस्थाहरुसँग सम्झौता गरिएको गाउँपालिकाले जनाएको छ ।
