बराहक्षेत्र । सुनसरीको बराहक्षेत्र नगरपालिका वडा नम्बर ३ काे कार्यालयले तीन पत्रकारसहित २ खेलाडीलाई सम्मान गरेको छ । पत्रकारिता र खेल क्षेत्रमा सक्रिय तथा आफ्नो क्षेत्रबाट सकारात्मक योगदान दिएका ५ जनालाई आइतबार वडाकार्यालयमा एक कार्यक्रमबीच सम्मान गरेको हो ।
सम्मानित हुनेमा खबरबिटकर्मी तथा बराहदर्पणमा समेत आवद्ध दिपक पुरी, नयाँ अनलाइन साथै अन्य मिडियामा कार्यरत प्रकाश दिप्साली, बराह टिभि युटुब च्यानलका संचालक खड्क लिम्बु, खेल क्षेत्रका निशान लिम्बु र रोशन भुजेललाई वडाले सम्मान गरेको हो ।
वडामा रहेर सक्रियताका साथ पत्रकारीमा समर्पित रहि आवाज विहिनहरुको आवाज बन्दै आफ्नो गाउँठाउँमा भएका राम्रानराम्रा सबै गतिविधि लाई सत्य तथ्य र निस्पक्षताका साथ सबै सामु सम्प्रेषण गर्दै पत्रकारिताको क्षेत्रबाट योगदान गरेकोले सम्मान गरिएको वडाध्यक्ष रुद्र दाहालले बताए ।
नेपालकै प्रतिष्ठित प्रतियोगिता नेपाल सुपर लिग साथै ए डिभिजन खेलमा उत्कृष्ट सहभागिता जनाउँदै वडाको नमालाई उच्च पर्न सफल रहेका निशान लिम्बुल ेर सातटोबाटोबाट बी डिभिजन लिग खेल्दै सातटोबाटोलाई ए डिभिजनमा ल्याउन सफल भएका रोशन भुजेललाई समेत सम्मान गरेको दाहालले बताए । दुबै खेलाडी बराहक्षेत्र ३ का बासिन्दा हुन् ।
वडाको नाम राख्न विभिन्न क्षेत्रबाट पुर्याउनु भएको योगदानलाई कदर गर्दै खेलाडी निशान लिम्बुलाई १५ हजार, अर्का खेलाडी रोशन भुजेललाई ५ हजार र अन्य तीन पत्रकारलाई जनही ५ हजार र सम्मान पत्रले सम्मान गरेको वडासचिव निलम कार्कीले बताए । सम्मान कार्यक्रममा वडाध्यक्ष दाहालसहित वडा सदस्यहरु कमल लिम्बु, दानबहादुर थापा, निर्मला धामी, शान्ती नेपाली लगायतको उपस्थिति रहेको थियो ।
यता सम्मानित हुने पत्रकार प्रकाश दिप्सालीले भने बराहक्षेत्रमा पहिलोपटक जनप्रतिनिधिले सम्मान कार्यक्रम गरेको हामी एकदम हर्सित भएको बताए ।
