सुनसरी । धरानमा ११ वर्षदेखि भाडामा भवन लिएर सञ्चालन गर्दै आएको बजाजको अर्बिन एण्ड ब्रर्दश अटोले आफ्नै भवनबाट सेवा दिने भएको छ । मंगलबार धरानस्थित आफ्नै भवनमा शोमरुम उद्घाटन गरी सञ्चालनमा ल्याएको हो ।
धरान ८ खहरेखोला छेउमा अटोको नयाँ शोरुम हंसराज हुलासचन्द एण्ड कम्पनीका निर्देशक अभिमन्यू गोल्छा र संचालक लक्ष्मण तामाङले संयुक्त रिबिन काटेर उद्घाटन गरेका हुन् ।
यसअघि भाडाको घरमा चलाइएको शोरुमको अहिले आफ्नै जग्गामा भवन निर्माण गरी शोरुम खोलेको अटोका सञ्चालक अरबिन्द तामाङले बताए । सञ्चालक तामाङले ११ वर्ष भाडामा बसेको र आफ्नै जग्गामा भवन बनाई आजबाट विधिवत उद्घाटन गरी सेवा सञ्चालन गरेको बताए ।
यस्तै, पूर्वकै ठूलो र अत्याधुनिक पार्टस, स्पेयर्स शोरुम पनि सञ्चालनमा ल्याइएको उनले जानकारी दिए । ‘यसअघि सानो ठाउँमा मर्मतसम्भारलगायत पार्टस पनि बिक्री गर्दै आएका थियौं,’ उनले भने, ‘त्यही भएर यहाँ आफ्नै जग्गामा आफ्नै भवन निर्माण गरेका छुट्टै स्पेयर्स र पाट्सको शोरुम पनि सञ्चालनमा ल्याएका हौं ।’
मङ्गलबार हंसराज हुलासचन्द एण्ड कम्पनीका निर्देशक अभिमन्यू गोल्छा, महाप्रबन्धक योगेन गुरुङलगायतको उपस्थितिमा शोरुमको उद्घाटन भएको छ । कम्पनीका निर्देशक गोल्छाले रिवन काटेर दुवै शोरुमको उद्घाटन गरेका थिए । कार्यक्रममा सञ्चालक लक्ष्मण तामाङको अध्यक्षतामा सम्पन्न भएको थियो ।
बजाजको नयाँ शोरुमले आफ्ना ग्राहकहरुलाई उच्चस्तरीय सेवा पुरयाउँदै सधैं अगाडि बढ्ने र बजाजको सेल्स, सर्भिस र स्पेयर्स देशभर उपलब्ध गराउन उद्देश्यलाई सार्थक बनाउन सहयोग गर्ने निर्देशक गोल्छाले बताए ।
बजाज, नेपालकै सर्वाधिक बिक्री हुने विश्वासिलो अटोमोबाइल ब्राण्डले ग्राहकहरुलाई खरिद गरेको सामग्रीमा अधिकतम मूल्य प्रदान गर्न सधै प्रतिबद्ध रहेको उनको भनाइ छ । नयाँ शोरुमले ग्राहकहरुलाई बाइकको स्पेयर्स पार्टस् तथा एसेसरिज खरिदका लागि सहज बनाउने विश्वास लिइएको सञ्चालक तामाङ बताउँछन् । यसैको माध्यमबाट ग्राहकहरुलाई उच्चस्तरीय, विश्वस्त सेवा र अझै आधुनिक सुविधा सुनिश्चित गर्दै बजाजलाई आफ्नो बिक्रीलाई थप सशक्त बनाउने सञ्चालक तामाङको भनाइ छ ।
धरानमा नयाँ शोरुम उद्घाटन गर्न पाउँदा निकै प्रसन्न भएको महाप्रबन्धक योगेन गुरुङले बताए । ‘हाम्रा ग्राहकहरुको संख्या निरन्तर वृद्धि भइरहेको छ, उहाँहरुलाई पूर्ण सन्तुष्टि र सुविधा प्रदान गर्नु हाम्रो जिम्मेवारी हो,’ उनले भने, ‘धरानमा यो नयाँ शोरुम विस्तारसँगै, हामीले आशा गरेका छौं कि यसले ग्राहकहरुको जीवन सहज बनाउनुका साथै उनीहरुले बजाज मोटरसाइकलको नयाँ अनुभव बटुल्ने अवसर प्राप्त गर्नेछन् ।’
शोरुम उद्घाटनको अवसरमा ग्राहकहरुलाई आकर्षक उपहारको व्यवस्था पनि गरिएको उनले जानकारी दिए ।
