इटहरी । इटहरी नमुना कलेजले अन्तर्राष्ट्रिय महिला हिंसा अन्त्य दिवसकाे अवसरमा लैङ्गिक हिंसा बिरुद्ध र्याली तथा ड्रिल डान्स सम्पन्न गरेको छ । लैङ्गिक हिंसा बिरुद्धको १६ दिने अभियानको पहिलो दिन कलेजकाे सामाजिक कार्य विभागले बिहीबार इटहरीमा र्याली तथा ड्रिल डान्स सम्पन्न गरेको हो ।
इटहरी नमुना कलेजमा स्नातक तर्फ सामाजिक कार्य र प्लस टु तर्फ कानुन संकायका विद्यार्थीहरुको सहभागितामा सचेतनामुलक र्याली तथा ड्रिल डान्स गरिएको थियो । कलेजबाट र्याली सुरु भइ इटहरी उपमहानगरपालिकाको गेट अगाडि ड्रिल डान्स गरी कार्यक्रम समापन गरिएको थियो ।
विसं. २०७० सालदेखि नै कलेज र कलेज अन्तरगत सामाजिक कार्य विभागले लैङ्गिक हिंसा बिरुद्ध विभिन्न कार्यक्रमहरु गर्दै आइरहेको सहभागी उषा सुवेदीले बताइन् । महिला हिंसा विरूद्धकाे अभियान त्यसै गरी कानुन अध्ययनरत सपना सुवेदीले महिलासम्बन्धि कुनै समस्या, घटना भएर अदालत भन्दा पनि घरबाटै सो किसिमका हिंसा अन्त्य गर्नुपर्ने बताइन् ।
अभियान अन्तरगत रक्तदान कार्यक्रम, खाद्यान्न वितरण कार्यक्रमलगायतका कार्यक्रम समेत आयोजना गर्ने कलेज अन्तर्गत सामाजिक कार्य विभाग प्रमुख शैलेन्द्र राईले बताए ।
विभिन्न सामाजिक संघसंस्थाहरुले लैङ्गिक हिंसा बिरुद्ध विविध कार्यक्रम गरी अभियान सुरू गरेका छन् । बिहीबार सुरु अभियान १० डिसेम्बरमा सकिन्छ । यस वर्ष लैङ्गिक हिंसा विरुद्धको राष्ट्रिय नारा ‘घरबाटै सुरु गरौं, महिला हिंसा अन्त्य गरौं’ रहेको छ ।
