सुनसरी । इटहरी नमुना कलेजले अन्तर्राष्ट्रिय युवा दिवसको अवसरमा विभिन्न कार्यक्रम आयोजना गरेको छ । अगस्त १२ का दिन दिवस भएपनि सार्वजनिक विदा भएकाले कलेजले केही दिन अघिदेखिनै अन्तरक्रिया, रक्तदान लगायतका कार्यक्रम आयोजना गरी दिवस मनाएको हो ।
विहीबार कलेज प्राङ्गणमा एकै साथ सांस्कृति कार्यक्रम र रक्तदान कार्यक्रम अयोजना गरिएको थियो । सांस्कृतिक कार्यक्रममा विद्यार्थीहरुले नृत्य, गायन लगायतका प्रतिभाहरु प्रस्तुत गरेका थिए । सँगै केही विद्यार्थीले युवाका विविध विषयमा आफ्ना विचार राखेका थिए । कक्षा १२ अन्तरगत कानुन अध्ययनरत केही विद्यार्थीहरुले अदालतको अभ्यास अन्तरगत नमुना अदालत समेत प्रस्तुत गरेका थिए ।
त्यसैगरी सामाजिक कार्य विभागको आयोजनामा भएको रक्तदान कार्यक्रममा ६० पिन्ट रगत संकलन भएको थियो ।
कलेजले स्थापनाकाल देखि नै युवा तथा सामाजिक क्षेत्रमा काम गर्दै आएको र सोही कार्यक्रमको निरन्तरता स्वरुप विभिन्न कार्यक्रममार्फत युवा विद्यार्थीहरुलाई समाज र देशप्रति जिम्मेवार बनाउन उत्प्रेरित गर्ने उद्देश्यका साथ कार्यक्रम आयोजना गरिएको कलेज प्रमुख धर्म न्यौपानेले बताए । स्नातक तहअन्तरगत सामाजिक कार्य विषय अध्ययनरत विद्यार्थीहरुले अध्ययनसँगै समाज बुझ्ने किसिमका कार्यक्रमहरु गरिरहेको र युवा विकासका लागि समेत यस्ता किसिमका कार्यक्रमले सहयोग पुग्ने सामाजिक कार्य विभाग प्रमुख नितेश गौतमले बताए ।
संचालक समितिका अध्यक्ष केशव खड्काले युवाहरु विना देशको राजनैतिक, आर्थिक, सामाजिक लगायतका परिवर्तन सम्भव नभएका कारणले उनीहरुलाई सहि ढङ्गले राज्यले व्यवस्थापन गर्नुपर्नेमा जोड दिए ।
पछिल्लो समयमा युवाहरु देशको विषम परिस्थितिको कारणले गर्दा युवा शक्ति ठूलो संख्यामा विदेश पलायन भइरहेकाले त्यसलाई रोक्नका निम्ति केन्द्रदेखि स्थानीय सरकारले युवा स्वरोजगार कार्यक्रममा जोडदिनु पर्नेमा कार्यक्रमका विशेष अतिथि युवा उद्यमी सन्तोष धमलाले जोड दिए ।
बुधबार समेत युवाका विविध विषयमा अन्तरक्रिया कार्यक्रम गरिएको थियो । स्नातक र ११ तथा १२ कक्षा गरी दुई भागमा भएको औपचारिक कार्यक्रममा युवाका समस्या, चुनौती, अवसरलगायतका विषयमा शिक्षक तथा विद्यार्थीहरुले आफ्ना विचार राख्नुका साथै अन्तरक्रिया समेत गरिएको थियो ।
“अन्तर पुस्ता ऐक्यबद्धता ः “सबै उमेर समुहमैत्री विश्व निर्माणमा प्रतिवद्धता” भन्ने मुल नाराका साथ यस वर्ष अन्तर्राष्ट्रिय युवा दिवस मनाइदैँछ । अगस्त १२ मा दिवस भएपनि देशका विभिन्न युवा क्लब, संघसंस्थाहरुले सप्ताहव्यापी कार्यक्रम समेत आयोजना गरिरहेका छन् ।
