लोकतान्त्रिक–वाम गठबन्धनले आयोजना गरेको चुनावी सभामा बम विस्फोट भएको छ ।
भोजपुरको पौवादुम्मा गाउँपालिकाको तिवारीभञ्ज्याङमा गठबन्धनले आयोजना गरेको चुनावी सभामा बुधबार दिउँसो साढे २ बजेको समयमा विस्फोट भएको हो ।
नेकपा (माओवादी केन्द्र)का अध्यक्ष पुष्पकमल दहाल प्रचण्डले सम्बोधन गरिने कार्यक्रममा विस्फोट हुँदा चरम्बी घर भएका सुमन श्रेष्ठ घाइते भएका छन् ।
एकजना शंकास्पद व्यक्तिले झोलामा बोकेको विस्फोटक पदार्थ सभालाई सम्बोधन गर्न प्रमुख अतिथि प्रचण्ड आउने वेलामा आचानक विस्फोट भएको र हाल अवस्था सामान्यमा आइसकेको १ नं. प्रदेश प्रहरी कार्यालयले जनाएको छ ।
अध्यक्ष दाहालले आज बुधबार एकै दिन मोरङ, सुनसरी, भोजपुर, खोटाङ र ताप्लेजुङमा गठबन्धन दलले आयोजना गर्ने चुनावी सभालाई सम्बोधन गर्ने कार्यक्रम थियो ।
मोरङको सुन्दरहरैँचा र सुनसरीको धरानमा भएको चुनावी सभालाई सम्बोधन गरिसकेपछि प्रचण्ड भोजपुर जान लागेको समयमा उक्त विस्फोट भएको हो ।
