सुनसरी । यतिबेला कान्तिपुर टेलिभिजनमा प्रशारण भइरहेको रियालिटी शो कमेडी च्याम्पियनको चर्चा बढी छ । नेपालमा कमेडी क्षेत्रको रियालिटि शो पहिलो पटक भएकाले पनि चर्चा बढी भएको हो । शोमा युटुबमा स्ट्यान्डप कमेडिमार्फत छाएकादेखि नयाँ अनुहारले समेत दर्शक र निर्णायकको मन जितिरहेका छन् ।
यसैबीच ‘कमेडी च्याम्पियन’मा सुनसरी इटहरीका सुमन कोइरालाले पनि प्रतिस्पर्धा गरिरहेका छन् । कोइरालाले दिने प्रस्तुतीले सबै निर्णायकहरु उत्साहित देखिएका छन् भने दर्शकले पनि उत्तिकै मन पराइरहेका छन् । सोमा प्रस्तुत गर्ने उनका विषयवस्तु र प्रस्तुतीका कारण दर्शकस्रोता बढ्दै गएका हुन् ।
उनी ‘कमेडी च्याम्पियन’ को ‘टप–१५’ भित्र प्रवेश गरिसकेका छन् । सानैदेखि हास्यक्षेत्रमा निकै रुचि भएका सुमनका लागि यो ‘शो’ उपयुक्त मञ्च बन्न पुगेको छ । आफूभित्र भएको प्रतिभा पोख्ने अवसर कमेडी च्याम्पिय भएको र यही मञ्चबाट अझ राम्रा कन्टेन्ट र प्रस्तुती दिने कोइराला बताउँछन् ।
सुमनले ‘कमेडी च्याम्पियन’मा प्रस्तुत गर्ने विषय नेपाली यथार्थ बोकेका हुन्छन् । उनको विषयवस्तुमा नेपालीपनको सुगन्ध आइरहेको दर्शक र निर्णायकहरुले बताउने गरेका छन् ।
कन्टेन्ट, कन्फिडेन्ट, हाउभाउ, प्रस्तुती र नयाँ पात्र बनाउदै गर्ने क्यारिकेचरले उनलाई निर्णायक तथा दर्शकहरुले खुलेर रुचाएका छन् । एकै विषयवस्तुमा रहेर सम्पूर्ण जानकारी दिनसक्ने उनको खुबी देख्दा निर्णायक मख्ख छन् । सुमनले टप–१० मा पुग्नका लागि ‘रक्सी भट्टी’बारे विषयवस्तुमा प्रस्तुती राखेका थिए ।
उनलाई यतिबेला टप १० मा पुग्नका लागि भोट आवश्यक छ । सबैलाई भोट गर्न उनले आग्रह गरेका छन् । नेपालमा रहेका दर्शकले इ–सेवा एप डाउनलोड गरि आफ्नो भोट गर्न सक्ने छन् । यस्तै नेपाल बाहिर रहेका दर्शकले ‘कमेडी च्याम्पियन’एप डाउनलोड गरेर भोट गर्नसक्ने आयोजकले जनाएको छ ।
नेपालमा पहिलो पटक सुरु भएको ‘कमेडी च्याम्पियन’ कान्तिपुर टेलिभिजन र रेडियो अडियोबाट प्रशारण भइरहेको छ । यो शोको निर्णायकमा हास्यकलाकार सन्तोष पन्त, मनोज गजुरेल, अभिनेत्री ऋचा शर्मा र चलचित्र निर्देशक प्रदीप भट्टराई छन् ।
विजेताले २५ लाख नगद र एउटा कार प्राप्त गर्ने छन् ।
