लकडाउनको समयमा मूल्यवृद्धि गर्ने, म्याद गुज्रिएका सामाग्री बिक्री गर्ने पसललाई बराहक्षेत्र नगरपालिकाले कारबाही गरेको छ ।
मंगलबार नगरपालिकाले चतरा बजारमा अनुगमन गर्दा चुरोट, नुन, दाल अन्य खाद्यान्न बढी मूल्यमा बिक्री गरेको, म्याद सकिएको, मुल्य सूची पसलको बोड नराखेको पाइएपछि श्याम किराना पसल र भगवती किराना पसल पसललाई कारबाही गरेको हो ।
नगरभित्रका खाद्यान्न पसल खोल्ने समय नगरले नै तोकेको थियो । सो समयमा पनि मूल्यवृद्धि गरेको भन्दै गुनासा आएपछि अनुगमन गरेको अधिकृत मनुकुमार लिम्बुले बताए । पहिलो पटक सम्झाइबुझाइ गरेको र दोहोरिएको न्यूनतम ५ हजारदेखि २० हजार रुपैयाँसम्म जरिवाना लिने उनले बताए ।
कारबाहीमा परेको दुबै किराना पसललाई नगरपालिकाले चिठी काटेर बोलाएपछि नगद ५ हजार रुपैयाँ जरिवाना लिने उपप्रमुख कमला मगरले बताइन् ।
अनुगमन गर्ने क्रममा चतराका अधिकांश व्यापारीहरुले मूल्यसूची बिना बिक्री गरेको, केही पसलमा म्याद गुज्रिएको पेयपदार्थ समेत भेटिएको मगरले बताइन् ।
अनुगमनमा आर्थिक विकास शाखाका प्रमुख मातृका तिवारी, बजार अनुगमन संयोजक तथा उपमेयर कमला मगर, अधिकृत मनुकुमार लिम्बु, प्रहरी प्रतिनिधि रुद्र खड्का, पत्रकार लगायतको सहभागिता थियो ।
