सुनसरी । बराहक्षेत्र २ चतरामा जारी चौथो टुबोर्ग बराह गोल्डकप फुटबल प्रतियोगिताको बिहीबारको अन्तिम सेमिफाइनल खेलमा एभरेष्ट फुटबल क्लब विजयी भएको छ । धनकुटा फुटबल क्लब धनकुटालाई ३ ० गोल अन्तरले हराउँदै एभरेष्ट विजयी बनेको हो । बिहीबारको जितसँगै एभरेष्ट फाइनलमा प्रवेश गरेको छ ।
खेलको १५औं मिनेटमा एभरेष्टका निशान लिम्बूले पहिलो खाता खोलेर खेल अग्रता दिएका थिए । खेलको ५४औं मिनेटमा एभरेष्टकै निशान लिम्बूको पासलाई तिर्थ बस्नेतले गोल फर्काए । खेलको ६२औं मिनेटमा पुनः एभरेष्टका निशान लिम्बूले गोल गरे ।
यता एभरेष्ट अब ९ कात्तिक शनिबार चर्च ब्वाइज फुटबल क्लब काठमाडौंसँग गोल्डकप उपाधिका लागि प्रतिस्पर्धा गर्नेछ । बिहीबारको खेलमा २ गोल गरेका एभरेष्टका निशान लिम्बु म्यान अफ दि म्याच घोषित भए । उनले नगद ५ हजार तथा ट्र्फि प्राप्त गरे ।
आदर्श माबिको खेल मैदानमा कात्तिक ९ सम्म सञ्चालन हुने प्रतियोगिताको बिजयी टिमलाई २ लाख १ हजार, मेडल, ट्रफी र प्रमाणपत्र प्रदान गरिने आयोजक क्लबले जनाएको छ। यसैगरी उपबिजेताले १ लाख १ हजार रुपैयाँ, मेडल, ट्रफी र प्रमाणपत्र प्राप्त गर्नेछ ।
प्रतियोगिताको मुख्य प्रायोजक टुबोर्ग बियर रहेको छ । प्रतियोगितालाई बराहक्षेत्र नगरपालिकाको कार्यालय संयोजक तथा वडा १ र २ को कार्यालय सहसयोयोजक रहेका छन् ।
