मोरङको पथरीशनिश्चरे नगरमा स्थापित पथरीशनिश्चरे बुक क्लबलाई स्थानीय एक युवाले करिब ६० हजार रुपैयाँ बराबरका पुस्तक प्रदान गरेका छन् ।
दशैंको अवसर पारेर पथरीशनिश्चरे ८ सोमबारेका चन्द्र राईले बुक क्लबलाई ६० हजार रुपैयाँ बराबरका पुस्तक प्रदान गरेका हुन् । गाउँमा खुलेको बुक क्लब राम्रो लागेको र नगरमा पाठकको संख्या बढाउने उद्देश्य क्लबले राखेकाले आफूले सहयोग गरेको राईले बताए । ‘पाठक संख्या बढाउने र थप साहित्यिक कार्यक्रम गर्ने उद्देश्य बोकेर गाउँमा बुक क्लब स्थापना भएको छ’ उनले भने, ‘सहयोग गर्न पाउँदा खुशी छु, आगामी दिनमा पाठकहरु झन् बढ्नेछन् भन्ने विश्वास पनि छ ।’
प्रभात सामुदायिक युवा क्लबद्वारा संरक्षित सो बुक क्लबले स्थापनाको छोटो समयमा नै स्थानीयलाई पुस्तक पढ्न आकर्षित गर्दैआएको छ । राई आफैंपनि राम्रो पाठक भएको र यो सहयोगले क्लबमा थप टेवा पुगेको प्रभात सामुदायिकका अध्यक्ष नवीन कार्कीले बताए । नगरमा अझ साहित्यिक कार्यक्रम बढाउँदै जाने र थप सहयोगी भेटिए नगरमा पाठक बढाउन सकिने कार्कीको भनाई छ । स्थापना हुँदाको समयको तुलनामा अहिले पाठकहरुको संख्या बढिरहेको कार्कीले बताए ।
करिब ६ महिना अघि स्थापना भएको पथरीशनिश्चरे बुक क्लबले साहित्यिक विमर्श, रचनावाचनलगायतका कार्यक्रम गर्दै आएको छ । साथै साहित्य प्रेमी पाठकहरुले क्लबका पुस्तकहरु अध्ययन गर्न सक्ने क्लबले जनाएको छ ।
यो बिषयमा तपाईको प्रतिकृया