सुनसरीको बराहक्षेत्र नगरपालिकाले मापदण्ड अनुसारको क्वारेन्टाइन निर्माण गर्ने भएको छ । नगरमै एक युवकलाई कोरोना भाइरस पुष्टि भएपछि नगरले क्वारेन्टाइन बनाउन लागेको हो ।
सरकारको मापदण्ड अनुसार नगरका तीन वटा सामुदायिक विद्यालयमा क्वारेन्टाइन बनाउने नगर कार्यपालिकाले निर्णय गरेको छ । बिहीबार बसेको नगर कार्यपालिकाको बैठकले बराहक्षेत्र ६ चक्रघट्टीमा रहेको महेन्द्र मा.बि., बराहक्षेत्र १० प्रकाशपुरमा रहेको प्रकाश मा.वि. र बराहक्षेत्र ३ भरौलमा रहेको महेन्द्र मा.वि. गरि तीन वटा सामुदायिक विद्यालयहरुलाई क्वारेन्टाइन बनाउने बैठकले निर्णय गरेको हो ।
चतरास्थित रामानन्दाचार्य सेवा पीठलाई क्वारेन्टाइन बनाउन प्रदेश सरकारलाई सिफारिस गर्ने समेत निर्णय भएको नगरपालिले जनाएको छ ।
तत्कालको लागि महेन्द्र मा.विमा शुक्रबारदेखिनै बनाउन सुरु गर्ने र अन्य ठाउँमा भने बिस्तारै आवश्यकता अनुसार क्वारेन्टाइन बनाउने तयारी गरिरहेको प्रमुख प्रशासकीय अधिकृत राजेशप्रसाद पोख्रेलले जानकारी दिए ।‘उक्त क्वारेन्टाइनमा आवश्यक पर्ने सम्पुर्ण सामाग्रीहरु तयारी अवस्थामा राखिने छ,’ उनले भने, ‘क्वारेन्टाइनमा वाइफाइदेखि सिसिक्यामेरा समेत जडान हुन्छ ।’
बराहक्षेत्र बासीहरुलाई नेपाल र भारत सीमानासम्म आइपुगेका र जिल्ला भन्दा बाहिरका जिल्ला, भारत लगायत तेस्रो मुलुकबाट नेपाल आउने र बिभिन्न स्थानमा अलपत्र अवस्थामा रहेका वराहक्षेत्रका नगरवासीलाई सहजीकरण गरी नगर ल्याइने र क्वारेन्टाइनमा राखिने निर्णय भएको समेत पोख्रेरले जानकारी दिए ।
उनका अनुसार क्वारेन्टाइनमा बस्नेहरुलाई खानाको व्यवस्था नगर र क्वारेन्टाइनको सुरक्षा निकायले गर्ने छ । आवश्यक परेको खण्डमा बराहक्षेत्रभित्रका सामुदायिक विद्यालयलाई क्वारेन्टाइन बनाउन सकिने पोख्रेलको भनाइ छ ।
यसअघि रेडक्रस भवनमा निर्माण गरिएको क्वारेन्टाइन मापदण्ड अनुसारको थिएन ।
बराहक्षेत्र ११ मधुवनमा एक युवकलाई कोरोना संक्रमण पुष्टि भएपछि नगरले १० र ११ नम्बर वडालाई बुधबार नै सिल गरेको छ ।
