रामधुनी । सुनसरीमा युरिया मल अभाव भएसँगै किसान चिन्तित बन्न थालेका छन् । युरिया मल बजारमा सहज रुपमा नपाउँदा धानमा हाल्न नपाएको कृषकहरुले गुनासो गरेका छन् ।
नेपालमै मल नपाएपछि जिल्लाका दक्षिणी क्षेत्रका कृषकहरुले कम गुणस्तरको मल भारतीय सीमा बजारबाट ल्याउने गरेका छन् ।नेपालमा मल नपाएको र हाल्दै नहाल्नुभन्दा धान जोगाउन छिमेकी मुलुकबाट भएपनि ल्याउने गरेको हरिनगर गाउँपालिकाका एक किसानले बताए । नेपालमै मल नपाउँदा महँगो मूल्य तिरेर भारतीय बजारबाट ल्याउन बाध्य भएको किसानहरुको भनाइ छ ।
इनरुवालागयतका बजारमा भने बिलेकमा मल बेच्ने गरेको पाइएको छ । तर कृषि साझा, साझा सहकारी, डिलरलगायतका स्थानमा भने मल सकिएको छ । धान रोपाईँ सकिएको करिब एक महिनामा हाल्नुपर्ने भएपनि मल नपाएर समस्या भएको रामधुनी ८ का जितेन्द्र चौधरीले बताए । ‘बजारमा मल पाउन गाह्रो छ, साझा, सहकारी वा डिलरहरुमा पनि युरिया मल छैन’ उनले भने । हालसम्म आफैंले नकिनेपनि छिमेकी मुलुक भारतीय बजारबाछ छिमेकी किसानहरुले मल ल्याउँदा ठगिएको उनले बताए ।
अघिल्ला वर्षहरुमा पनि समयमै मल नपाउने समस्याबाट ग्रसित छन् किसानहरु । भारतको बजारबाट ल्याइने मल कम गुणस्तरको हुने, प्रतिबोरामा ४/५ केजीसम्म तौल घटेको हुने, महँगो मूल्य पर्ने भएपनि बाध्य भएर किन्नुपरेको किसान बताउँछन् ।
रामधुनी नगरपालिका, बराहक्षेत्र, इनरुवा नगरपालिकालगायत जिल्ला भरिनै यतिबेला मल अभाव छ । दक्षिण भेगका किसानहरुले बिलेक(चोरीनिकासी गरी ल्याइ महँगोमा बिक्री हुने) मा भएपनि किन्न पाइरहेका छन् भने अन्य क्षेत्रका किसान भने बजारमा मलको अभाव छ ।
भदौको पहिलो हप्ता आउन सक्छ : कृषि सामाग्री संस्था, विराटनगर
उता विराटनगरमा रहेको कृषि सामाग्री संस्था लिमिटिडको क्षेत्रीय कार्यालयका प्रमुख नवरत्न गौतमले भदौको पहिलो सातामा मल उपलब्ध हुने सम्भावना रहेको बताए । ‘साल्ट ट्रेङ्गि कर्पोरेशन काठमाडौंले खरिद प्रक्रिया अघि बढाएको छ’ उनले भने, ‘किसानहरुले कहिले पाउँछन् त्यो त भन्न सकिने अवस्था छैन, तर हामीले सुने र थाहा पाएअनुसार भदौको पहिलो साता मल आउन सक्छ ।’
उनका अनुसार साल्ट ट्रेङ्गि काठमाडौंले मल कहिले आइपुग्छ त्यस विषयमा जानकारी गराएको छैन । तर अनौपचारीक रुपमा पाएको जानकारी अनुसार भदौ पहिलो साता मल आइपुग्ने उनको भनाइ छ ।
देशभरी नै समस्या छ : कृषि सामाग्री कम्पनी सुनसरी
कृषि सामाग्री कम्पनी लिमिटेड सुनसरी शाखा इटहरीले हाल युरिया मलको समस्या देशभरी नै रहेको जनाएको छ । विराटनगर हुँदै मल आइपुग्ने भएकाले तत्काल आउने सम्भावना नरहेको प्रमुख मेघप्रसाद लामिछानेले बताए । ‘हाल मलको समस्या देशभरी नै छ, सबै किसान समस्यामा छन्’ उनले भने, ‘हामीले गर्ने पहल गरेका छौं, सम्भवतः भदौको पहिलो वा दोस्रो सातामा आइपुग्ने भन्ने सुनेका छौं ।’
