काठमाडाैं । नेपालमा थप एकजना महिलामा कोभिड १९ को पोजेटिभ देखिएकोे छ ।
स्वास्थ्य तथा जनसंख्या मन्त्रालयमा बिहीबार आयोजित नियमित पत्रकार सम्मेलनमा मन्त्रालयका प्रवक्ता डाक्टर विकास देवकोटाले थप एक जना महिलामा कोरोना संक्रमण पोजेटिभ देखिएको जानकारी दिए ।
पछिल्लो संक्रमणका बिरामीसँगै कोरोना संक्रमितको संख्या ६ पुगेको छ । यी संक्रमित बिरामी पनि चैत ४ गते कतार एयरवेजको क्यूआर सिक्स फाईब टु नम्बरको उडानबाट काठमाडौं आएको प्रवक्ता डाक्टर देवकोटाले जानकारी दिए । छैटौ संक्रमित महिला बागलुङकी हुन् । यसअघि कतार एयरवेजको क्यू आर सिक्स फाईब टु नम्बरको उडानबाट नेपाल आएका दुई जनामा कोरोना संक्रमण पोजेटिभ देखिइसकेको थियो ।
अहिलेसम्म काठमाडौं र काठमाडौं बाहिर गरी १ हजार १ सय ८४ वटा नमुना परीक्षण गरिएको पनि डाक्टर देवकोटाले जानकारी दिए । ४३ वटा काठमाडौमा र धरानमा १२ वटा नमुना परीक्षणको क्रममा रहेको तथा सैनिक अस्पतालले १७ वटा स्वावको नमुना परीक्षणका लागि लिएको उनले बताए । डाक्टर देवकोटाका अनुसार १६ जना उपत्यकामा र ९९ बाहिर गरी मुलुकभर १ सय ५ जना आइसोलेसनमा छन् ।
उनले मन्त्रालयको एप्समा ४हजार १ सय ९८ जनाले आफ्नो स्वास्थ्य विवरण भरेको र ती मध्ये १७ जना रेडमा रहेकाले उनीहरुको स्वावको परीक्षण गर्ने जानकारी दिए ।
