बराहक्षेत्र नगरबासीहरुले कडा रुपमा लगाइएको लकडाउन पूर्ण रुपमा पालना गरिरहेका छन् । उदयपुरमा १२ जनामा कोरोना संक्रमण भएपछि सुनसरी प्र्रशासनले जिल्ला भरी लकडाउन थप कडा बनाएको थियो ।
गत ५ वैशाखदेखि ८ गतेसम्म आवतजावतमा पूर्ण रुपमा बन्द, अत्यावश्यक वस्तु, डेरी, फार्मेसी समेत बन्द गर्न आह्वान गरेकोमा बराहक्षेत्रबासीले भने पालना गरेको ईलाका प्रहरी कार्यालय चक्रघट्टिका इन्सपेक्टर शरणकुमार दाहाल बताए । आदेश अनुसार बराहक्षेत्र नगरपालिका भित्र नेपाल प्रहरी र सशस्त्र प्रहरीले पनि पूर्णरुपमा कडाइ गरेको छ ।
इलाका प्रहरी कार्यालयले सबै चौकीलाई परिचालन गरेको छ । चोकचोकमा प्रहरीलाई ड्युटिमा खटाइएको, इलाकाको गाडीमा गस्ती गरिएको र चौकिका प्रमुखहरु गाउँगाउँमा गस्ती गरिरहेको भरौल प्रहरी चौकीका प्रमुख बिनोद दाहालले बताए । बाटोमा हिँडेका मानिसहरुलाई उठबस गराइ पुनः बाटोमा भेटिए क्वारेन्टाइनमा राख्ने जानकारी गराउँदै फर्काउने गरेको प्रहरीले जनाएको छ । इलाका प्रमुख दाहालले भने २ दिनयता बाटो सुनसान भएको बताए ।
बराहक्षेत्रमा गस्ती गर्दै हिँडदा जनप्रतिनिधि, पत्रकार लगायतसमेत बाटोमा नहिँडेको उनले बताए । सशस्त्र बल प्रहरी चतराले लकडाउन पालना गराउन रातदिन नभनी गस्ती गरिएको चतराका सशस्त्र प्रमुख असोक न्यौपानेले बताए । ‘हामीसँग गाडी थिएन । लकडाउन भएपछि स्थानीय सरकारले हामीलाई गाडी उपलब्ध गरायो । अहिले हामी गाडीबाटै गस्ती गरिरहेको छौं ।’
बराहक्षेत्र वडा ४ अध्यक्ष आसाराम चौधरीले अरुबेलाको लकडाउन भन्दा अहिले थप ३ दिनको लकडाउनमा पुर्ण कडाइ भएको बताए । अरुबेला केही मात्र मानिस हरु आवतजावत गर्ने गरेपनी अहिले सबै जनताले लकडाउनलाई पुर्णरुपले पालना गरेको बताए ।
