सुनसरीको रामधुनी नगरपालिका ६ स्थित बहत्तर बिगाहबाट गोलिया काठसहित ३ जना पक्राउ परेका छन् ।
विश्वब्यापी रुपमा फैलिएको कोरिना भाइरस संक्रमणको त्रासका कारण देशमा लकडाउन जारी रहेको अवस्थामा केही स्थानीय युवाहरुले काठ तस्करीको प्रयास गरेको प्रहरीले जनाएको छ । सोमबार रामधुनी ६ बस्ने केही स्थानीय युवाहरु मिलेर बहत्तर बिगाहास्थित राष्ट्रिय वन इलाकाबाट ट्याक्टरमा लोड गर्दै गर्दा उनीहरुलाई पक्राउ गरेको सशस्त्र प्रहरी बल नेपालका गणपति कृष्ण ढकालले बताए ।
अवैध रूपमा उनीहरुले करिब एक सय २० क्युफिट बराबरको ९ थान गोलिया साल जातको टुना लोड गर्दैगर्दा पक्राउ गरेको प्रहरीले जनाएको छ । प्रहरीका अनुसार उक्त काठको मूल्य ४ लाख २० हजार रहेको छ ।
को २ त ९९९० नम्बरको ट्याक्टरमा लैजान लागेको अवस्थामा उनीहरुलाई पक्राउ गरेको ढकालले बताए । पक्राउ पर्नेमा रामधुनी ६ बस्ने ४१ वर्षीय केशव खड्का, २४ वर्षीय अर्जुन लिम्बू र ३३ वर्षीय रोशन राई रहेको प्रहरीले जनाएको छ । उनीहरुको साथबाट ४ थान मोबाइल सेट र एउटा मोटरसाइकल समेत नियन्त्रणमा लिएको ढकालले बताए ।
सशस्त्र प्रहरी बल इनरुवालाई बिशेष सूचना पुगेपछि सोही आधारमा सशस्त्र प्रहरी बल नेपाल नम्बर ४ गण हेडक्व्क्टर सुनसरीका गणपति कृष्ण ढकालको नेतृत्वमा आएको टोलिले पक्राउ गरेको हो । टोलीले पक्राउ गरी जिल्ला वन कार्यालय सुनसरीलाई बुझाएको ढकालले बताए ।
