बराहक्षेत्र । सुनसरीको नगरपालिका वडा नम्बर ६ बुधबारेका युवा समाजसेवी टेकेन्द्र कार्कीले बराहक्षेत्र आइसोेशन सेन्टरलाई ३० वटा अक्सिजन सिलिन्डर दिने भएका छन् ।
कार्कीले घोषणा गरेअनुसारमध्ये १८ वटा अक्सिजन सिलिन्डर आइतबार नै नगरपालिकामार्फत आइसोलेसन सेन्टरमा हस्तान्तरण गरिसकेको नगरपालिकाका प्रमुख प्रशासकीय अधिकृत मनुकुमार लिम्बुले बताए । लिम्बुका अनुसार सोमबार (आज) थप १२ वटा सिलिन्डर आउनेछ । आज थपिएकोसहित कार्कीको तर्फबाट सेन्टरलाई ३० वटा अक्सिजन सिलिन्डर प्राप्त हुनेछ ।
पछिल्लो समय बराहक्षेत्रमा कोरोना संक्रमितको संख्या बढ्दै गएकोले संक्रमितको उपचार सहजरुपमा होस् भन्ने उद्देश्यले अक्सिजनसहितको सिलिन्डर हस्तान्तरण गरेको कार्कीले बताए ।
कार्कीले आवश्यक परेमा थप १० वटा सिलिन्डर उपलब्ध गराउने प्रतिवद्धता गरेका छन् ।
