इटहरी । प्रधानमन्त्री केपी शर्मा ओलीले संसद विघटन गरे यता संघीयताको खारेजीको माग समेत तीब्र रुपमा उठ्न थालेको छ । यही सन्दर्भमा राजसंस्था र हिन्दु राज्यको माग राख्दै सुनसरीको इटहरीमा आगामी बुधबार वृहत्त कार तथा मोटरसाईकल र्याली आयोजना हुने भएको छ ।
पूर्वाञ्चलबासी नेपाली जनताको नाममा आयोजना गर्न लागेको कार र्याली भव्य हुने पत्रकार सम्मेलन मार्फत सोमबार आयोजकले जानकारी दिएको हो ।
राजसंस्था र सनातन धर्म सहितको हिन्दु अधिराज्यका लागि राजनैतिक दल भन्दा माथि उठेर इटहरीदेखि विराटनगरसम्म आयोजना गरिने कार तथा मोटरसाईकल र्यालीमा सहभागी हुन आयोजकका तर्फबाट रामु पोखरेलले आग्रह गरे । मुलुक संकटमा रहेको अवस्थामा दल भन्दा माथि उठेर राजसंस्थासहित हिन्दु राज्य कायम गर्दै संघीयता खारेजीका लागि दवाव दिन र्यालीको आयोजना गर्न लागेको पोखरेलले जानकारी दिए ।
पत्रकार सम्मेलनमा पत्रकारहरुको जवाफ दिँदै पोखरेलले संघीयता नेपालका लागि उपयुक्त नभएको संसद विघटनले समेत पुष्टि गरी सकेको बताए । विदेशीहरुको इसारामा केही नेताहरुका बलमा जबरजस्ती राजसंस्था, सनातन हिन्दु राज्य खारेज गरेर गणतन्त्र स्थापना गरिएपनि गणतन्त्र छोटो समयमै असफल भई सकेको आयोजकका सुरज कँडेलले दाबी गरे । र्याली ऐतिहासिक हुने कँडेलको दाबी छ ।
आयोजकको तर्फबाट रामु पोखरेल, सुरज कँडेल र युगप्रिय निरौलाले पत्रकारहरुको प्रश्नको जवाफ दिएका थिए। पत्रकार सम्मेलनमा दिपेन्द्र कार्की, आकास सुब्बा, रमा बास्तोला, युगप्रिय निरौला, गिता नेम्वागं, दुर्गा लामा लगायतको सहभागिता रहेको थियो ।
