उदयपुर । उदयपुरको बेलका नगरपालिकामा वडा नं. ४ स्थित सामुदायिक विद्यालय जनता नमुना मा वि गुरुङचौरीले स्कुल बस सञ्चालनमा ल्याउने भएको छ । निजी विद्यालयले प्रयोगमा ल्याइरहेपनि सामुदायिक विद्यालयको तर्फबाट नगरमै पहिलो पटक स्कुल बस सञ्चालनमा ल्याउने भएको हो ।
विद्यालय खरिद प्रक्रियाको लागि अन्तिम तयारीमा रहेको छ । यस अघि स्कुल बस खरीदका लागि टेन्डर समेत आह्वान गरेको थियो ।
सरकारको भन्सार छुट सहुलियतमा १८ लाख ५० हजार बराबरको ४० सिट क्षमताको स्कुल बस खरिदको प्रकृया अगाडि बढाइएको र अन्तिम चरणमा पुगेको बिद्यालय व्यवस्थापन समितीका अध्यक्ष मनोज तामाङले बताए । अध्यक्ष तामाङका अनुसार बस खरिदको लागि स्वीकृत बस कम्पनीमा केही रकम पठाइसकिएको छ ।
‘सम्भवत यसै साता भित्र बस विद्यालयमा आइपुग्नेछ,’ अध्यक्ष तामाङले भने, ‘अन्य स्कुल बसहरु आवश्यकता अनुसार थप गरिदै लगिनेछ, सम्भवत २ देखि ३ वटासम्म स्कुल बस निकट समयमै थपिन सक्छ ।’
गरिब जनताका छोरीछोरीहरुलाई गुणस्तरीय शिक्षासँगै यातायातको थप सुविधासहित विद्यालय सञ्चालनको तयारीमा रहेको प्रधानाध्यापक समरबहादुर राई बताउँछन । बिद्यार्थी र अभिभावकहरुको सुविधालाई मध्यनजर गरेर बस खरिदको प्रकृयामा विद्यालय लागेको उनको भनाइ छ ।
विद्यालयले सिभिल इन्जिनियरिङको पठनपाठन बिहान ८ बजेदेखि साँझ ५ बजेसम्म संचालन गर्ने, नेपाली र अंग्रेजी माध्यमको कक्षामा अध्ययन गर्ने छात्रछात्रा टाढाटाढाबाट आउनुपर्ने भएकोले यातायातको सुविधा विद्यालयले गरेको राईले बताए । उनका अनुसार यातायात सुविधा वापत अभिभावकले सामान्य शुल्क तिर्नु पर्नेछ ।
बेलका नगरमा मावि गुरुङचौरीले यसै वर्षबाट प्राविधिक धारतर्फ सिभिल इन्जिनियरिङ पठनपाठनको स्वीकृतसँगै नेपाल सरकारबाट नमुना विद्यालयको रुपमा छनौट भएको छ । यसै शैक्षिक सत्रबाट अंग्रेजी माध्यमबाट शिसुदेखि कक्षा ८ सम्म अध्यापन गराउने गरी सम्पुर्ण तयारी पुरा गरिसकेको प्रअ राईले बताए ।
