रामधुनी । नेपाल प्रेस युनियन इनरुवा नगर कार्यसमितिले पत्रकारहरुलाई ब्याग र मास्क वितरण गरेको छ । इनरुवा लगायत आसपासका क्षेत्रमा रहेर पत्रकारिता गर्दै आएका २५ जना पत्रकारहरुलाई ब्याग र मास्क वितरण गरेको हो ।
पत्रकारहरुको हक अधिकार र पेशागत सुरक्षाका लागि आवाज उठाउँदै आएको बेला पत्रकारहरुलाई आवश्यक पर्ने सामाग्री राख्नको लागि २५ जना पत्रकारहरुलाई ब्याग वितरण गरिएको संयोजक टोमराज मेहताले जानकारी दिए ।
कार्यक्रमका प्रमुख अतिथि इनरुवा नगरपालिकाका नगर प्रमुख राजन मेहताले पत्रकारहरुप्रति सकारात्मक रहेको बताए । उनलेले कोरोनाको बेला सबै सचेत र सर्तक रहन अनुरोध गरेका थिए । प्रेस युनियन इनरुवाले गरेको ब्याग वितरण कार्यक्रमले पत्रकारहरुबीचको सम्वन्धलाई प्रगाढ गरेको उनले बताए । पत्रकारहरुले हिजोका दिनका धेरै दुःख गरेको र अहिले श्रोत साधन भएकाले पत्रकारिता गर्न सहज भएको नगरप्रमुख मेहताको भनाइ छ ।
नेपाल पत्रकार महासंघका केन्द्रीय सदस्य तथा कार्यक्रमा विशिष्ट अतिथि इकवाल अहमदले लोकतन्त्रवादी पत्रकारहरुको संगठन नेपाल प्रेस युनियन इनरुवा नगरले गरेको ब्याग वितरणले सकारात्मक सन्देश प्रवाह भएको बताए । पत्रकारहरुको हकअधिकारका लागि काम गर्ने प्रेस युनियन इनरुवा नगरले अगामी दिनमा पत्रकारहरुको लागि ठोस योजना ल्याएर काम गुर्नुपर्नेमा समेत जोड दिएका थिए । कोरोनाको महामारीमा संचारकर्मीहरुले सचेत भएर काम गर्नुपर्ने उनले बताए ।
कार्यक्रममा नेपाल पत्रकार महासंघ सुनसरी अध्यक्ष जनकऋषि राईले युनियनको कार्य सराहनीय भएको बताए । नेपाल पत्रकार महासंघ सुनसरी शाखामा समावेशी तरिकाले इनरुवा क्षेत्रका पत्रकारहरुलाई समेटेको उनले बताए ।
नेपाल प्रेस युनियन इनरुवा नगरका सभापति टोमराज मेहताले आफूले घोषणा गरेको १० बुँदे घोषणापत्रको पहिलो पटक कार्यान्वयन गरेको बताए । अरु बाँकी रहेको नौवटा बुँदालाई कोरोनाको महामारी सकिएपछि तुरुन्तै कार्यान्वयन गर्न ढिलाइ नगर्ने बताए ।
प्रेस युनियनका इनरुवा सभापति मेहताका अनुसार बुधबार २५ जना पत्रकारहरुलाई एक/एक थान ब्याग र एक/एक प्याकेट मास्क वितरण गरिएको हो । इनरुवा नगरपालिकाको सहकार्यमा एक हजार थान मास्क उपलब्ध गराएको सभापति मेहताले बताए ।
