सुनसरीमा कोरोना संक्रमित पत्रकारहरुका लागि सञ्चालन गरिएको ‘मोबाइल डाक्टर’ सेवा प्रभावकारी बन्दै गएको छ ।
नेपाल प्रेस युनियन सुनसरीले जिल्लाका कोरोना संक्रमित सञ्चारकर्मीहरुको घरमै गएर मोबाइल डाक्टर सेवा दिंदै आएको छ । युनियनका सुनसरी अध्यक्ष पवन अधिकारीका अनुसार धरानमा रहेका कोरोना संक्रमित सञ्चारकर्मीहरुलाई बिहीबार मोबाइल डाक्टर सेवा प्रवाह गरिएको छ ।
धरानका तीनजना सञ्चारकर्मीहरुलाई घरमै पुगेर चिकित्सकीय परामर्श र औषधि प्रदान गरिएको उनले बताए । धरानका पत्रकार कमानसिंह राई, नवीन रम्तेल र नेगेटिभ रिपोर्ट आएर पनि शरीर अस्वस्थ रहेका पारस राईलाई उनीहरु बसेकै स्थानमा गएर चिकित्सकहरुले बिहीबार परामर्श गरेका हुन् ।
टोलिमै गएका नेपाल पत्रकार महासंघ सुनसरीका अध्यक्ष जनकऋषि राईले प्रेस युनियन सुनसरीले गरेको काम अत्यन्तै प्रभावकारी बनेको बताए । उनले प्रेस युनियनले कोरोना कालमा निकै महत्वपूर्ण काम गरेको भन्दै प्रसम्सा समेत गरेका छन् ।
घरमै चिकित्सकीय टोलीसहित युनियनले स्वास्थ्य अवस्था बुझ्न आउनु सकारात्मक रहेको संक्रमित पत्रकारहरूले बताएका छन् । उनीहरुले घरमै आएर स्वास्थ्य अवस्था बुझेर आवश्यक स्वास्थ्य सामाग्री सहित औषधी दिदाँ कोरोना जित्नका लागि हौसला मिलेको बताएका हुन् ।
मोबाइल डाक्टर सेवाका लागि डा. अमितकुमार खतिवडा, औषधि विज्ञ धनेश्वर शर्मा, स्टाफ नर्स किरण चौधरीले चिकित्सकीय परामर्श दिंदै आएका छन् ।
