सुनसरीको बराहक्षेत्र नगरपालिकाले गत चैतदेखि कोरोना व्यवस्थापन राहत कोषमा स्थापना गरेपछि अहिलेसम्म उक्त कोषमा १ करोड ८३ लाख १३ हजार ६ सय ६८ रुपैयाँ ३३ पैसा जम्मा भएको छ ।
असार १० सम्मका विवरण अनुसार सो रकम जम्मा भएको नगरपालिकाले बिनियोजन गरेका शीर्षक मध्ये कोरोना रोकथाम तथा राहतकोषमा १ करोड ३१ लाख बजेट रकमान्तर गरिएको लेखा अधिकृत बिरेन्द्र यादवले जानकारी दिए ।
कोरोना राहतकोषमा रकमान्तर कुन कुन शिर्षकमा भयो र कति ?
उद्दार राहत तथा पुर्नस्थापन कोषबाट १० लाख, विपत् व्यवस्थापन तथा पूर्व तयारी र प्रति कार्य १५ लाख, विपन्न वर्ग उत्थान कार्यक्रम २० लाख, विपदका घटनाबाट पीडितहरुलाई राहत व्यवस्था ५ लाख, संघसंस्था अनुदान १० लाख, बहुजातीय संग्रहालय १० लाख, मिथिला संग्रहालय ५ लाख, अपांग सहकारीलाई विउपुजी अनुदान २० लाख, एकल सहकारीलाई विउपुजी अनुदानबाट २० लाख, विपद व्यवस्थापन १६ लाख गरि नगरपालिकाको तर्फबाट जम्मा १ करोड ३१ लाख बजेट कोरोना राहत कोषमा जम्मा गरिएको बताए ।
त्यसैगरी गैरसरकारी संघसंस्थाहरुबाट १४ लाख ९२ हजार ३ सय २२ रुपैयाँ, बराहक्षेत्र नगरपालिका जनप्रतिनिधि तथा शिक्षा कर्मचारी तलब कट्टीबाट २४ लाख २ हजार १ सय ३५ रुपैयाँ, ब्यक्तिगत सहयोग ३ लाख १९ हजार २ सय ११ रुपैयाँ र प्रदेश सरकारबाट १० लाख गरि हालसम्म स्थानीय तहको प्रकोप व्यवस्थापन राहतकोष जम्मा १ करोड ८३ लाख १३ हजार ६ सय ६८ रुपैयाँ ३३ पैसा जम्मा भएको लेखा अधिकृत यादव बताए ।
कोरोना राहतकोषमा कति खर्च भयो ?
राहत वितरण कार्यक्रम चामल खरिदमा ७१ लाख ४७ हजार ७ सय ५० रुपैयाँ, दाल खरिदमा ११ लाख ७३ हजार ७ सय ५६ रुपैयाँ, तेल नुन र साबुनमा १६ लाख ३७ हजार ९ सय ९० रुपैयाँ , १,२,४,६,७,८,९,१०,११ वडालाई राहत सामग्री बितरण गर्न नपुग सामग्री खरिद गर्दा जम्मा ४ लाख ८१ हजार ७ सय ७३ रुपैयाँ, ढुवानी खर्च १ लाख ६१ हजार ८ सय ५० रुपैयाँ, विविधमा ६७ हजार ५ सय र सामान प्याकिङ खर्च ९ हजार ६ सय गरि जम्मा १ करोड ६८ हजार २ सय १९ रुपैयाँ राहत वितरणमा खर्च भएको नगरपालिकाले जनाएको छ ।
क्वारेन्टाइन व्यवस्थापनमा कति खर्च ?
बराहक्षेत्र नगरपालिका भित्र बराहक्षेत्र नगरपालिका ६ महेन्द्र मावि, वडा नम्बर १० प्रकाश मावि, वडा ११ मधुवन मावि र वडा ३ महेन्द्र माविमा गरी ४ वटा क्वारेन्टाइन राखिएको थियो । मधुवनमा भने अझै क्वारेन्टाइनमा बसिरहेका छन् । नगरले उनीहरुको हेरचाह खानपान स्वास्थ सामाग्री गाडीभाडा लगायत अन्य खर्च व्यवस्थापन गर्न अहिलेसम्म २८ लाख ८८ हजार ३९ रुपैया खर्च गरेको छ ।
नगरपालिका राहत वितरण र क्वारेन्टाइन व्यवस्थापन गरि जम्मा १ करोड ३८ लाख ९८ हजार १ सय ३६ रुपैयाँ खर्च गरेको सार्वजनिक गरेको छ ।
जसमा नगरपालिकाले खर्च कटौती गरि कोषमा नगद मौज्दात ४४ लाख १५ हजार ५सय ३१ रुपैयाँ बाकी रहेको छ । उक्त रकम कोरोना भाइरस निर्मुल नहुनजेल यसमा खर्च हुने र पछी आपतकालीन अवस्थामा समेत खर्च गर्न सकिने लेखा अधिकृत यादव बताए ।
