रामधुनी । सुनसरीस्थित रामधुनी ५ कि १७ वर्षीया किशोरीलाई मोरङको विराटनगर हुँदै भारत बेच्न लैजादैँ गर्दा उद्धार गरिएको छ । ती किशोरीलाई विराटनगर हुँदै तीनजनाको समूहले भारत लगेको थियो ।
भारतको फारबिसगञ्ज क्षेत्रमा पुगेर नेपाल फर्कदै गर्दा विराटनगर महानगरपालिका – १७ इस्लामपुरबाट किशोरीको उद्धार गरिएको हो ।
उनलाई भारततर्फ लैजाने मोरङको लेटाङ नगरपालिका–३ घर भई रामधुनी नगरपालिका– ५ झुम्कामा तरकारी पसल सञ्चालन गर्ने २२ वर्षीया मनिका ढकाल, सप्तरी विष्णुपुर गाउँपालिका– ५ घर भएका सुमितकुमार मण्डल र सप्तरीकै तिलाठी कोइलाडी गाउँपालिका १ घर भई विराटनगर बस्दै आएका २० वर्षीय प्रदीपकुमार मण्डललाई प्रहरीले पक्राउ गरी सार्वजनिक गरेको छ ।
जिल्ला प्रहरी कार्यालय मोरङका प्रहरी उपरीक्षक सन्तोष खड्काले मनिका ती किशोरीको घर नजिकै बस्ने हुनाले घरमा पनि आउजाउ रहेको बताए । मोरङ खड्काले भने बलि नै दिने वा अरु केही गतिविधिमा लगाउने अहिले नै खुलि नसकेको बताए ।
सुमितले मनिकालाई प्रयोग गर्दै प्रदीपको पनि सहयोग लिएर किशोरीलाई भारत पु¥याउन खोजेको प्रारम्भिक अनुसन्धानबाट खुलेको एसपी खड्काले बताए ।
झुम्का बसाईकै क्रममा चिनजान भएकी किशोरीलाई सुमितले सिकाएर ललाईफकाई मनिकाले विराटनगर ल्याएको खुलेको छ । फेसबुकको चिनजानका आधारमा सुमितले किशोरीलाई विराटनगर ल्याउन मनिकालाई प्रयोग गरेको देखिएको प्रहरीले जनाएको छ ।
एउटा पूजामा लैजाने र पूजामा गए वापत पाँच हजार रुपैयाँ दक्षिणा पनि पाइनेभन्दै मनिकाले आइतबार बिहान ७ बजेतिर किशोरीलाई फकाएर विराटनगर ल्याएको प्रहरीको प्रारम्भिक अनुसन्धानबाट खुलेको छ ।
विराटनगर बसपार्क उत्रिएपछि उनलाई सुमित र प्रदीपसमेत मिलेर भारततर्फ लगेका थिए । प्रहरीका अनुसार मनिका फेसबुक मार्फत सुमितसँग नजिकिएकी थिइन् । पछिल्लो केही दिनयता मनिकालाई सुमितले विवाह नभएकी युवती ल्याइदिए ४–५ लाख रुपैयाँ दिने आश्वासन दिएका थिए ।
प्रहरीले तीनै जना विरुद्ध मानव बेचविखन मुद्दामा अनुसन्धान गर्न जिल्ला अदालतबाट म्याद थप गरेको छ ।
