यहि चैत्र ४ गते प्रदर्शनमा आउन लागेको नेपाली कथानक चलचित्र चिसो एस्ट्रे यतिबेला प्रचारप्रसारको लागि देश दौडाहामा निस्किएको छ । निर्माण टिम प्रदेश १ का विभिन्न स्थानमा कलेज क्याम्प तथा पत्रकार भेटघाट कार्यक्रममा सक्रिय रहेको छ ।
निर्माण युनिटले विराटनगरमा विराटनगर इन्टरनेसनल कलेज र इटहरीको इटहरी इन्टरनेसनल कलेजुमा कलेज क्याम्पु गरेको छ भने इटहरीमा पत्रकार सम्मेलन समेत गरेको छ । प्रचारप्रसारका लागि चलचित्रकी मुख्य अभिनेत्री सृष्टि श्रेष्ठ, अभिनेता निकुन श्रेष्ठ र कार्यकारी निर्माता महेशबाबू तिमिल्सिनाको उपस्थिति रहेको थियो । विराटनगर र इटहरीको कलेज क्याम्पमा निर्माण युनिटले छायांकनका क्रममा गरिएको व्यवस्थापन पक्ष र सो बेलाको आरोहअवरोहलाई कलेजका विद्यार्थीहरु माझ प्रस्तुत गरिएको थियो । त्यस्तै चलचित्रको ट्रेलर समेत देखाउँदै कलेज क्याम्पमा निर्माण युनिटले चिसो एस्ट्रेलाई हलमा हेर्दै नेपाली चलचित्रलाई माया गर्न आग्रह गरे ।
यस्तै इटहरी र धरानका पत्रकारहरू उपस्थित रहेको पत्रकार सम्मेलन इटहरीमा अवस्थित पुर्वाञ्चल इन्स्टिच्युट अफ फिल्म एण्ड टेलिभिजनको कार्यालयमा आयोजना गरिएको थियो । पत्रकार सम्मेलनमा चलचित्रका कार्यकारी निर्माता तिमिल्सिनाले कोरोनाले गर्दा चलचित्र प्रर्दशनमा ल्याउन ढिलो भएपनि नेपाली दर्शकहरुले रुचाउने विषय भएकोु जानकारी दिए । यस्तै नायिका श्रेष्ठले चलचित्रले नेपाली दर्शकहरुको मन जित्न सफल हुने विश्वास व्यक्त गरिन् ।
पत्रकार सम्मेलनमा उपस्थित भएका अभिनेता निकुनले पनि गाउँबाट सहरमा आउने मानिसका सपना कसरी एस्ट्रेको चुरोटझैं निभ्दै जान्छ भन्ने कुरा चलचित्रले प्रस्तुत गर्नेु र ७ वर्षको अन्तरालमा धेरै दुःख र मेहनत सहित निर्माण सम्पन्न भएको जानकारी गराए । उनले यो चलचित्रले दर्शकहरूको लगानी उठाउनेमा कुनै शंका नरहेको उनले बताए । चलचित्र चिसो एस्ट्रे कवि भुपी सेरचनको कविता चिसो एस्ट्रेबाट प्रभावित भएर निर्माण गरिएको पत्रकार सम्मेलनमा कार्यकारी निर्माता तिमिल्सिनाले बताए ।
दिन्स पाल्पालीले निर्देशन गरेको फिल्ममा सृष्टि श्रेष्ठ र निकुन श्रेष्ठको अलावा दिव्य देव, सुशील पाण्डे, नविन लम्साल र रविन तामाङको मुख्य भूमिका रहेको छ । दिन्स पाल्पालीकै लेखन रहेको फिल्ममा अजर जंगमको संगीत छ । कंगारु क्रिएसन र लोकल सिनेमाको संयुक्त ब्यानरमा निर्मित चलचित्रलाई महेशबाबु तिमल्सिनाले प्रस्तुत गरेका हुन् । निर्माणमा भने महेशबाबुलाई प्रवीण स्याङ्बा र सुष्मिता पराजुलीले सघाएका छन् । सहनिर्मातामा भने रुपेश ढुंगाना, नवीन ढुंगाना र सुजन खतिवडा रहेका छन् । निर्माणमा क्रिएटिभ ह्यान्डस् नेपालको पनि सहभागिता छ । उज्जल बस्ताकोटीको छायांकन रहेको चलचित्रमा उज्वल ढकालले सम्पादन र प्रशान्त रसाइलीले क्रिएटिभ हेडको जिम्मेवारी निर्वाह गरेका छन् ।
