सुनसरीको बराहक्षेत्र नगरपालिका ३ भराैलकाे जमुना गाछीस्थित नयाँ खोलिएको प्लटिङमा एक युवाको शव फेला परेको छ । झापा दमकका ३७ वर्षीय कमल राईको शव फेला परेको प्रहरीले जनाएको छ ।
शुक्रबार बिहानै बन्दै गरेको एक तले घरमा पानी लगाउन आउँदा प्रताप लामाले बाटैमा घोप्टो परेको अवस्थामा युवकलाई प्लटिगंमा मृत अवस्थामा देखेपछि भरौल प्रहरीलाई खबर गरेका थिए ।
मृतक राई हाल बराहक्षेत्र ३ भानुचौक निवासी साली मन्जु राईको घरमा बस्दै आएको इलाका प्रहरी कार्यालय प्रमुख शरणकुमार दाहालले बताए ।
राईको शव खेतको बाटोमाथि घोप्टो परेको अवस्थामा फेला परेको र शवको प्रकृति हेर्दा कुटपिटबाट मृत्यु भएको हुन सक्ने दाहालले बताए ।
राईले बिहीबार केही ब्याक्तीहरुसँग मिलेर मादकपदार्थ सेवन गरेको देखेको स्थानीयले बताए । इलाका प्रहरी पकलीको टोलीले थप अनुसन्धान अघि बढाएको छ ।
मृतक राई केही वर्ष अघि बराहक्षेत्र ३ बांगेबाट बसाइसराई गरी दमक गएका थिए ।
