बराहक्षेत्र नगरपालिका ३ स्थित जमुना गाछीमा शुक्रबार मृत भेटिएका ३७ वर्षीय कमल राईको हत्या भएको अनुसन्धानबाट खुलेको छ । हत्या गरेको आरोपमा शुक्रबार नै ७ जनालाई प्रहरीले पक्राउ गरेको थियो ।
अनुसन्धान गर्ने क्रममा ५ जनालाई शुक्रबारनै छाडिएको भरौल प्रहरी चौकीका प्रमुख बिनोद दाहालले बताए । दुई जनाले हत्या गरेको स्वीकारेका छन् ।
कमल राईको हत्या गर्ने बराहक्षेत्र ३ इक्राही बस्ने २२ वर्षीय सालो पर्ने गणेश लिम्बु र उनको साथी इक्राही नै बस्ने १९ वर्षीय प्रदीप राजधामीले गरेको अनुसन्धानबाट पुष्टि भएको छ ।
गणेश लिम्बूले किन गरे हत्या ?
केही महिना अघि सालो पर्ने गणेशलाई मिलन चौकमा सामान्य कुटपिट गरेको विषय लिएर कमललाई मार्छु भनेर रिस लिएर मौका छोपेर बसेका लिम्बूले बिहीबार भने कमलले धेरै रक्सी सेवन गरेका थिए । पुनः लिम्बु र राजधामीसँग मिलेर रक्सी खाएर खेत तिर लगेको स्थानीयले देखेको प्रहरीकार्यालय महेन्द्रनगरका प्रहरी निरीक्षक शरण दाहालले बताए ।
हत्या गर्ने गणेश कमलको दोस्रो श्रीमतीमध्ये जेठीपट्टिको सानिमाको छोरा भएको उनले बताए । ‘सामान्य विषयमा साला भेनाबीच विवाद रहेछ,’ उनले भने, ‘त्यही रिसमा बिहीबार राति सँगै मदिरा सेवन गरेर सालोले अर्को एक साथीको मद्दत लिएर कमलको निर्मम हत्या गरेका हुन्’ ।
कमल राति ८ बजे एक्लै घर फर्किरहेको अवस्थामा गणेशले बाटोमा भेटाइ मदिरा सेवन गर्न लगेको र पछि ११ बजे जमुना गछीमा लगेर असारेको काठको लाठीले टाउको र अनुहारमा प्रहार गरी कमलको हत्या गरेको प्रारम्भिक अनुसन्धानबाट खुलेको दाहालले बताए ।
गणेश र प्रदिपले नै कमलको हत्या गरी बराहक्षेत्र ३ जमुना गाछीमा नयाँ खोलिएको प्लटिङमा फालेको प्रहरी निष्कर्षमा पुगेको छ ।
इलाका प्रहरी कार्यालय महेन्द्रनगरले दुबैजनालाई लुकेको अवस्थामा विभिन्न स्थानबाट पक्राउ गरेको हो । दुवै जनाले कमलको हत्या गरेको स्वीकार गरिसकेको प्रहरी निरीक्षक दाहालले जानकारी दिए ।
सालो पर्ने गणेशले कुटपिट भए देखिनै कमलमाथि बदला लिने योजना बनाएको देखिएको प्रहरीको भनाइ छ । त्यस रात पनि पूर्व योजना अनुसार मदिरा सेवन गराई एकान्त ठाउँमा लगेर अनुहार नचिन्ने गरी लाठीले प्रहार गरी हत्या गरेको देखिएको छ ।
कमल झापा दमक बस्ने भए पनि पछिल्लो ६ महिनादेखि उनी ससुराली घर भरौलमा बस्दै आएका थिए । कमल ६ महिना अघि मात्र मदिरा ओसारपसार गरेको अभियोगमा जेलबाट निस्केर ससुरालीमा बस्दै आएको पाइएको छ ।
पक्राउ परेका दुबैलाई कर्तव्य ज्यान अन्तर्गत मुद्दा चलाइने प्रहरीले जनाएको छ ।
