बराहक्षेत्र । गत २२ र २३ गते लगातार परेको वर्षाका कारण बराहक्षेत्रमा लगाइएको कृषिबालीमा ठूलो क्षति पुगेको छ ।
बराहक्षेत्र नगरपालिकाको कृषि शाखाले सो वर्षाले नगरपालिका भित्र एक सय बिघा जमिनमा लगाइएको कृषिबालीमा क्षति पुगेको जनाएकाे छ । साथै यो वर्ष ३० प्रतिशत उत्पादन घट्न सक्ने सम्भावना रहेको नगरपालिकाको कृषि शाखाले जनाएको छ ।
बराहक्षेत्र नगरपालिका वाड नम्बर २ मा रहेको चारकोशे वनक्षेत्रबाट बगेर आएको पानी धानखेतमा पस्दा नगरको वाड नम्बर ६, ७ र ८ मा बढी क्षति भएको कृषक ललित आचार्यले बताए ।
ठूलो वर्षाका कारण बराहक्षेत्र नगरपालिका जलमग्न बन्न पुगेको छ । वर्षाले ठूलो असर कृषि क्षेत्रमा परेको छ । वर्षाका कारण कृषियोग्य जमिनमा भीषण बाढीआई कटान गरेर धेरै जग्गा तथा कृषि बालिहरु बगाएको छ भने धेरै अन्नबाली डुबानमा परेको छ ।
विशेषगरी हाल धानको बाला लाग्न सुरु हुने सिजन भएकोको बेला बढी मात्रामा परेको पानीले धान खेतीलाई ठूलो असर गरेको कृषक शुशिला सिग्देलले बताइन् । त्यस्तै यसले दाल तथा विभिन्न तरकारी बालीमा पनि क्षति पुर्याएको छ । पोखरीमा पानी भरिँदा माछाहरु भागेको माछापालक कृषकहरुले बताए ।
पानी निकासको माध्यम नभएकोले यस्तो ठुलो असर पर्न गएको किसान ज्ञानबहादुर कट्वालको भनाइ छ । धान खेतिमा भर्खरैमात्रै कृषकहरुले युरीया मल लगाएको र यस बाढीले सम्पुर्ण मल बगाएकाले धान उब्जनीमा ठूलो गिरावट आउने कृषकहरुको अनुमान छ ।
क्षतिको न्युनीकरण गर्नका लागि बराहक्षेत्र नगरपालिकाले क्षतिको प्रकृति हेरी कृषकहरूलाई राहत दिनुपर्ने तथा आउँदा वर्षहरुमा यसवाट बच्न पानी निकासको बिकल्प खोज्नुपर्ने कृषि विज्ञको भनाइ छ । कृषकहरुले हाल बजारमा मल अभाव रहेकोको बेला वषार्ले धान खेतिमा हालेको मल बगाएकाले पुनः मल हाल्न पने भएकोले नगरपालिका समक्ष मल उपलब्ध गराउन कृषकले अनुरोध गरेका छन् ।
