रामधुनी । सुनसरीको रामधुनी नगरपालिकाको मुख्य बजार झुम्कासहित विभिन्न ठाउँका फोहोर व्यवस्थापन हुन सकेको छैन । समयमै फोहोर व्यवस्थापन हुन नसक्दा नसक्दा डेंगी संक्रमणको जोखिम बढ्दै गइरहेको छ ।
हाल देशका विभिन्न ठाउँमा डेंगी संक्रमण दर बढिरहेको समयमा झुम्का र आसपासका क्षेत्रमा फोहोरको अवस्था उस्तै हुँदा रोगको जोखिम बढ्ने सम्भावना रहेको स्थानीय बताउँछन् । अघिल्ला वर्षहरुमा डेंगी संक्रमणको जोखिम घटाउन विभिन्न ठाउँमा लामखुट्टे भगाउने औषधि छरेपनि यसवर्ष त्यस्तो केही नभएको रामधुनी ८ का सर्वन कुमार चौधरीले बताए । ‘अघिल्लो वर्ष डेंगी संक्रमण कम गर्न किटनाषक औषधि छारिएको थियो,’ उनले भने, ‘यस वर्षको जोखिम बढ्दै गएपनि हालसम्म नगरको तर्फबाट केही पनि पहल भएको छैन ।’
फोहोर उठाउनका लागि स्थानीय पालिकाको गाडी आए पनि सम्पूर्ण फोहोर नउठाएको स्थानीय व्यवसायी भुवनेश्वर चौधरीले बताए । ठाउँठाउँमा फोहोर फाल्ने डस्डबिन पनि नभएको कारण यसको व्यस्थापनमा पनि कमी भएको उनको भनाई छ ।
डेंगुको संक्रमित भइसकेपछि काम गर्न पनि निकै गाह्रो भएको झुम्काका विजय फुयाले बताए । आफू संक्रमित भएको र हाल संक्रमणमुक्त भएको जानकारी दिँदै उनले अहिले बाहिरको काम गर्न कमजोर महसुस भइरहेको बताए ।
रामधुनी नगरपालिकाले पनि डेंगुको समस्यालाई समाधान गर्न लामखुट्टेको दबाई हाल्ने लगायतको काममा प्रथमिक्ताका साथ काम गर्दै गरेको रामधुनी नगरपालिकाका स्वास्थ्य शाखा प्रमुख नगेन्द्र पौडेले जानकारी दिए । उनले एक हप्ता दिन भित्रमा लामखुट्टेको समस्यालाई समाधान गरिने प्रतिवद्धता जनाए ।
