सुनसरीमा जारी निषेधाज्ञा भोलिदेखी केही खुकुलो पारिने भएको छ । जिल्ला प्रशासन कार्यालय सुनसरीको बुधबार बसेको बैठकले निषेधाज्ञा खुकुलो पार्ने निर्णय गरेको हो ।
पछिल्लो पटक पाँचदिनयता मात्रै प्रशासनले जेठभर निषेधाज्ञा गर्ने र कुनै पसल खोल्न नपाइने निर्णय गरेको थियो । तर, बुधबारको बैठकले भने निषेधाज्ञा केही खुकुलो पार्ने जनाएको छ ।
बैठकको निर्णय अनुसार फलफूल तथा तरकारी विक्रिको हकमा भने विहान १० देखि ३ बजेको अवधि भित्र ठेला गाडा समेतमा राखी घरघरमा पुर्याउन सकिने छ । यद्यपि, बैठकले सब्जी मण्डी, गुद्री, हाट बजारमा बिक्रि गर्न र त्यस्तो बजार लगाउन भने नपाइने भनेको छ ।
यसैगरी डीसीसीएमसीले स्टेसनरी पसल समेत १० बजे देखि ३ बजेसम्म खोल्न दिने निर्णय गरेको छ । त्यस्तै, दूध, माछामासु बिहान १० बजेसम्म र साँझ ४ बजेदेखि ७ बजेसम्म खोल्न पाइनेछ ।प्रशासनले त्यस बाहेकका यस अघिका अन्य निर्णय भने यथावत रहने जनाएको छ ।
अन्य समयमा भने बन्द गर्नुपर्ने प्रशासनले जनाएको छ । यसअघिका अन्य निर्णयहरु भने यथावत् नै रहेको प्रमुख जिल्ला अधिकारी उमेशकुमार ढकालले जानकारी दिए ।
जिल्लामा पहिलोपटक वैशाख १६ गते बैठक बसेर १७ गतेबाट निषेधाज्ञा गर्ने निर्णय गरेको थियो ।
