सुनसरी । इटहरी उप–महानगरपालिका ११ बाट लागुऔषधसहित २ जना पक्राउ परेका छन् भने पक्राउ परेकाहरुले दिएको सूचनाको आधारमा बीर मेडिलकल हलका संचालकलाई समेत पक्राउ गरिएको छ ।
सोमबार राति ७ बजे जाँचमा खटिएको प्रहरी चौकी खनारको प्रहरी टोलीले जाँच गर्ने क्रममा को ३४ प ६२ नम्बरको मोटरसाईकलमा सवारी चालक बुढिगंगा गाउँपालिका–७ का २२ वर्षीय राहुल उरावँ र पछाडी सवार रहेका सुन्दरहरैँचा नगरपालिका–३ का २५ वर्षीय सुमन मोक्तानलाई पक्राउ गरेको हो । उनीहरूको साथबाट निट्राभेट ८ ट्याब्लेट, ईनपाईन ३ ट्याव्लेट, स्पास्मो ३ ट्याब्लेट समेत बरामद गरिएको छ ।
पक्राउ परेकाहरुलाई सोधपुछ गर्ने क्रममा इटहरी १० मा संचालित बीर नारायण मेडिकल हलबाट खरिद गरी ल्याएको खुल्न आएपछी उक्त मेडिकल हलमा खानतलासी गर्ने क्रममा मेडिकल हलबाट ८५८ ट्याब्लेट लागुऔषध स्पास्मो बरामद भएको थियो ।
लागुऔषध बरामद भएसँगै मेडिकल हल संचालक इटहरी १० का ३० वर्षीय उमेश चौधरीलाई समेत पक्राउ गरी थप अनुसन्धान गरिरहेको इलाका प्रहरी कार्यालय इटहरीले जनाएको छ ।
