ओखलढुङगा । मोलुङ गाउँपालिका-३ थुम्कीका १७ वर्षीय लालमान तामाङको भरुवा बन्दुकले लागेर मृत्यु भएको छ ।
सोमबार दिउँसो २ बजे स्थानीय थुम्की जंगलमा बाँदर लखेट्ने क्रममा चित्र बहादुर सुनुवारले बोकेको भरुवा बन्दुक पड्कदा तामाङ घाइते भएका थिए । घाइतेलाई उपचारका लागि काठमाडौं लैजाने क्रममा बाटोमा नै मृत्यु भएको थियो ।
घटनाबारे जानकारी पाए लगत्तै इलाका प्रहरी कार्यालय बरुणेश्वरबाट प्रहरी टोली खटि गई घटनामा संग्लन्न रहेका सुनुवारलाई पक्राउ गरेको छ । उक्त घटनामा संग्लग्न अन्य ४ जना फरार रहेकोले खोजी भइरहेको छ ।
घटनास्थलबाट १ थान लोड भएको अवस्थामा र १ थान पड्किएको अवस्थामा रहेको भरुवा बन्दुक समेत बरामद भएको छ । घटना सम्बन्धमा थप अनुसन्धान भइरहेको जिल्ला प्रहरी कार्यालय ओखलढुङगाले जनाएको छ ।
