सुनसरी । बराहक्षेत्र नगरपालिकामा गत पुस १५ गतेदेखि सञ्चालित लोकसेवा आयोग तयारी कक्षा सम्पन्न भएको छ ।
उक्त कार्यक्रममा बराहक्षेत्रका करिब १२ जातीका समुदायहरुले सहभागी जनाएका थिए । महिला पुरुष गरी ६१ जना लोकसेवा तयारी कक्षामा सहभागी भएको कार्यवाहक अध्यक्ष बेचन राजधामीले बताए ।
उक्त तयारी कक्षामा सहभागीहरुले धरौटी स्वरुप पाँच सय रुपैयाँ राखेर ४५ दिनसम्म कक्षा लिएका थिए ।
उक्त कक्षामा बराहक्षेत्र नगरपालिका निमित्त प्रशासकीय अधिकृत मनुकुमार लिम्बुले र बराहक्षेत्र नगरकै लेखा अधिकृत बिरेन्द्र यादवले सहजीकरण गरेका थिए ।
बराहक्षेत्र नगरपालिकाको सहयोगमा भएको उक्त कार्यक्रम आदिवासी जनजाति महासंघ बराहक्षेत्र नगरपालिका समन्वय समितिले व्यवस्थापनको भूमिका निभाएको थियो ।
तयारी कक्षालाई डट लिङ्क कन्सलटेन्सी प्रा. लि.ले अयोजना गरेको थियो ।
शुक्रबार भएको समापन कार्यक्रममा आदिवासी जनजाती महासंघका कार्यवाहक अध्यक्ष बेचन धामीको सभापतित्व रहेको थियो । कार्यक्रममा बराहक्षेत्र नगरपालिका मेयर निलम खनालको प्रमुख आतिथ्यता, बराहक्षेत्र नगरपालिका निमित्त प्रशासकीय अधिकृत साथै तयारी कक्षा प्रमुख प्रशिक्षक मनुकुमार लिम्बु लगायतको विशेष आतिथ्यता रहेको थियो ।
उक्त कार्यक्रम सञ्चालन गर्न बराहक्षेत्र नगरपालिकाले ४ लाख रुपैयाँ बजेट छुट्याएको जनजाती आदिवासी महसंघका उपाध्यक्ष डिकबहादुर श्रेष्ठले बताए ।
